माळशेज घाटात भीषण अपघात! अहिल्यानगर-कल्याण महामार्गावर एसटी बस आणि आयशर टेम्पोची समोरासमोर धडक, तीन जण जखमी अन् वाहतूक विस्कळीत

पुणे आणि अहिल्यानगर जिल्ह्यांच्या सीमेवर असलेल्या प्रसिद्ध माळशेज घाटामधून एक मोठी अपघाताची बातमी समोर आली आहे. अहिल्यानगर-कल्याण राष्ट्रीय महामार्गावर शुक्रवारी सकाळी ११ वाजण्याच्या सुमारास एसटी बस आणि आयशर टेम्पोची समोरासमोर जोरदार धडक झाली. या भीषण अपघातामध्ये दोन्ही वाहनांचे मोठे नुकसान झाले असून, प्राथमिक माहितीनुसार या दुर्घटनेत ३ ते ४ जण जखमी झाले आहेत. या घटनेमुळे घाटातील वाहतूक काही वेळ पूर्णपणे विस्कळीत झाली होती.

मिळालेल्या सविस्तर माहितीनुसार, नेहमीप्रमाणे एसटी महामंडळाची बस आपल्या ठरलेल्या मार्गावरून जात असताना माळशेज घाटातील अवघड वळणावर समोरून भरधाव वेगात येणाऱ्या आयशर टेम्पोने तिला जोरदार धडक दिली. धडक इतकी जोरदार होती की, एसटी बस आणि टेम्पोच्या समोरील भागाचा अक्षरशः चेंदामेढा झाला आहे. या अपघातात बसमधील आणि टेम्पोमधील काही प्रवाशांना व चालकाला दुखापत झाली असून जखमींना तातडीने उपचारासाठी नजीकच्या रुग्णालयात दाखल करण्यात आले आहे.

महामार्गावर वाहतूक कोंडी: अपघातानंतर दोन्ही मोठी वाहने रस्त्याच्या मधोमध बंद पडल्यामुळे अहिल्यानगर-कल्याण महामार्गावर दोन्ही बाजूंना वाहनांच्या लांबच लांब रांगा लागल्या होत्या. वीकेंडचा दिवस असल्यामुळे पर्यटकांची आणि प्रवाशांची मोठी वर्दळ या मार्गावर असते, त्यामुळे घाटामध्ये काही काळ मोठी वाहतूक कोंडी निर्माण झाली होती. घटनेची माहिती मिळताच स्थानिक पोलीस आणि प्रशासकीय अधिकारी तात्काळ घटनास्थळी दाखल झाले. त्यांनी क्रेनच्या मदतीने अपघाताग्रस्त वाहने बाजूला सारून रस्ता मोकळा केला, त्यानंतर वाहतूक हळूहळू सुरळीत करण्यात आली. माळशेज घाटातील या वारंवार होणाऱ्या अपघातांमुळे वाहनचालकांमध्ये भीतीचे वातावरण असून या मार्गावर सुरक्षिततेचे उपाय कडक करण्याची मागणी होत आहे.