Latur ZP Election Results : मराठवाड्यातील सर्वात मोठा राजकीय उलटफेर! राज ठाकरेंच्या मनसेच्या शिलेदारांनी भाजपाचा बालेकिल्ला फोडला

आज संपूर्ण राज्यात जिल्हा परिषद आणि पंचायत समितीच्या निकालाला सुरुवात झाली आहे. लातूर जिल्हा परिषद आणि पंचायत समिती निवडणुकीत महाराष्ट्र नवनिर्माण सेना (मनसे) ने अनपेक्षित यश मिळवले आहे. राज ठाकरे यांच्या नेतृत्वाखालील मनसेच्या उमेदवारांनी भाजपाच्या गडात धडक मारली असून, तीन जागांवर विजय मिळवला आहे. ही घटना मराठवाड्यातील राजकीय वातावरणात मोठा बदल घडवणारी ठरली आहे.

मनसेचे विजयी उमेदवार

रेणापूर तालुका – पानगाव जिल्हा परिषद गटातून डॉ. सुनील नागरगोजे (मनसे) यांनी विजय मिळवला.

पंचायत समिती गणातून मोनिका रवी सूर्यवंशी आणि श्रीदेवी गालफाडे (दोघी मनसे) यांनी यश मिळवले.

या विजयामुळे मनसेचे ‘इंजिन’ लातूरमध्ये सुस्साट सुरू असल्याचे चित्र आहे. राज ठाकरे यांच्या शिलेदारांनी विजयानंतर गुलाल उधळून उत्साह साजरा केला आहे. त्यांचा आनंद गगनात मावेनासा झाला आहे.

पार्श्वभूमी आणि मुख्य लढत

लातूर जिल्हा परिषदेच्या निवडणुकीत मुख्यतः काँग्रेस आणि भाजप यांच्यात थेट सामना होता. २०१७ च्या निवडणुकीत भाजपाने ३६ जागा जिंकून एकहाती सत्ता मिळवली होती. यावेळीही अमित देशमुख (काँग्रेस), संभाजीराव निलंगेकर पाटील आणि अभिमन्यू पवार (भाजप) यांच्या प्रतिष्ठेचा प्रश्न होता. पण मनसेच्या उमेदवारांनी अनपेक्षित यश मिळवून सर्वांना धक्का दिला.

काही प्रमुख निकाल (प्राथमिक माहितीनुसार)

लातूर तालुका – महाराणा प्रताप नगर गट: काँग्रेसचे महादेव मस्के विजयी.

भातांगळी गट: भाजपचे पांडुरंग बालवाड विजयी.

अहमदपूर तालुका – खंडाळी गट: राष्ट्रवादी काँग्रेस (शरद पवार गट)च्या शितल खोमणे विजयी.

जळकोट तालुका – वांजरवाडा गट: अपक्ष उमेदवार धर्मपाल देवशेट्टे विजयी.

आर्वी गट: काँग्रेसच्या राजश्री देशमुख विजयी.

लातूर तालुक्यातील दोन्ही पंचायत समित्या काँग्रेसच्या ताब्यात.

एकूणच, लातूर जिल्हा परिषदेच्या ५९ जागांसाठी चुरस होती. या ठिकाणी भाजपाला मोठा धक्का बसला असून, काँग्रेसनेही चांगली कामगिरी केली आहे. मनसेच्या या यशाने राज्यातील राजकीय समीकरणांवर नवीन चर्चेला उधाण आले आहे. मतमोजणी पूर्ण होताच अधिकृत निकाल जाहीर होतील, पण मनसेच्या या ‘सरप्राइज’ विजयाने मराठवाड्यातील राजकारणात नवा अध्याय सुरू झाला आहे.