पुणे: गोहे खुर्द येथे दरड कोसळली; मंचर-भीमाशंकर मार्ग वाहतुकीसाठी बंद, प्रशासनाचा सतर्कतेचा इशारा

पुणे: मुसळधार पावसाचा फटका मंचर–भीमाशंकर मार्गालाही बसला आहे. आंबेगाव तालुक्यातील गोहे खुर्द येथे मोठी दरड कोसळल्याने मंचर–भीमाशंकर रस्ता वाहतुकीसाठी पूर्णपणे बंद करण्यात आला आहे. नागरिकांच्या सुरक्षिततेच्या दृष्टीने प्रशासनाने हा निर्णय घेतला असून पर्यायी मार्गांचा वापर करण्याचे आवाहन करण्यात आले आहे.

सततच्या पावसामुळे डोंगराचा मोठा भाग खचून माती, दगड आणि झाडे रस्त्यावर आल्याने या मार्गावरील वाहतूक ठप्प झाली. सार्वजनिक बांधकाम विभाग, महसूल प्रशासन आणि पोलिसांची पथके घटनास्थळी दाखल झाली असून दरड हटविण्याचे आणि रस्ता पूर्ववत करण्याचे काम युद्धपातळीवर सुरू आहे.

भीमाशंकरकडे जाणाऱ्या भाविकांसह स्थानिक नागरिकांना या मार्गाचा मोठ्या प्रमाणावर वापर करावा लागतो. मात्र, दरड कोसळल्यामुळे वाहनचालकांना मोठा फटका बसला असून प्रशासनाने पुढील आदेश येईपर्यंत या मार्गाने प्रवास टाळण्याचे आवाहन केले आहे. तसेच घाट परिसरात आणखी दरडी कोसळण्याचा धोका कायम असल्याने नागरिकांनी विशेष खबरदारी घ्यावी, असेही सांगण्यात आले आहे.

भारतीय हवामान विभागाने पुणे जिल्ह्यात मुसळधार ते अतिमुसळधार पावसाचा इशारा कायम ठेवला आहे. त्यामुळे घाटमाथा आणि डोंगराळ भागात प्रवास करणाऱ्यांनी हवामानाचा अंदाज आणि प्रशासनाच्या सूचनांचे पालन करूनच प्रवास करावा, असे आवाहन करण्यात आले आहे.