धुळ्यात खळबळजनक उलगडा! कलाकेंद्रातील वादातून गर्भवती नृत्यांगणेचा खून करून मृतदेह पेटवला; ११ तासांच्या सीसीटीव्ही फुटेजच्या आधारे चौघांना बेड्या

धुळे/धाराशिव: धुळे जिल्ह्यातील गरताडबारी घाट परिसरात एका गर्भवती महिलेचा पेट्रोल टाकून अत्यंत निर्घृणपणे खून करण्यात आल्याची आणि तिचा जळालेला मृतदेह आढळल्याची खळबळजनक घटना उघडकीस आली होती. या गुन्ह्याचा छडा लावण्यात धुळे पोलिसांना मोठी यश आले असून, अवघ्या तीन दिवसांत या अंधाऱ्या गुन्ह्याचा पर्दाफाश करत पोलिसांनी कळंब येथील तिघांसह एकूण चौघा संशयितांना ताब्यात घेतले आहे, तर दोन जण अद्याप फरार आहेत. याप्रकरणी धुळ्यातील मोहाडीनगर पोलीस ठाण्यात खुनाचा गुन्हा दाखल करण्यात आला आहे.

२२ सप्टेंबर रोजी गरताडबारी घाटातील टेकडीलगतच्या वनक्षेत्रात एका गर्भवती महिलेचा मृतदेह अर्धवट जळालेल्या अवस्थेत आढळला होता. मृत महिलेची ओळख पटवणे पोलिसांसमोर मोठे आव्हान होते. धुळे जिल्ह्याचे पोलीस अधीक्षक विशाल आनंद यांच्या मार्गदर्शनाखाली स्थानिक गुन्हे शाखेच्या पोलीस निरीक्षक शिल्पा पाटील, सहायक निरीक्षक शरद बागल, मोहाडीनगर पोलीस ठाण्याचे निरीक्षक नितीन करंडे आणि सहायक निरीक्षक अशोक पायमोडे यांच्या विशेष पथकाने या प्रकरणाचा समांतर तपास सुरू केला. तपासादरम्यान पोलिसांनी घटनास्थळापासून सुमारे वीस किलोमीटर परिसरातील महामार्गावरील सीसीटीव्ही कॅमेऱ्यांचे सलग ११ तासांचे फुटेज तपासले.

या कसून तपासादरम्यान पोलिसांच्या नजरेस एक संशयित कार (एमएच-४३, एआर-४०७०) आली. या वाहनाच्या हालचालींचे तांत्रिक विश्लेषण केल्यानंतर तपास पथक थेट अहिल्यानगर जिल्ह्यातील जामखेड येथील सप्तसूर सांस्कृतिक कला केंद्रापर्यंत पोहोचले, जिथे संशयित पोलिसांच्या जाळ्यात अडकले. चौकशीदरम्यान मृत महिलेची ओळख पिंकी हनुमंत काटकर (वय ३१, रा. रायगड, बीड) अशी पटली. ती जामखेड येथील कला केंद्रात नृत्यांगणा म्हणून काम करत होती. कला केंद्रातील अंतर्गत वादातून मांजरसुंबा चौफुली (ता. व जि. बीड) येथे पिंकी काटकर यांना मारहाण करण्यात आली होती, ज्यामध्ये त्या बेशुद्ध पडल्या. त्यांचा मृत्यू झाल्याचे समजून पुरावा नष्ट करण्याच्या उद्देशाने संशयितांनी तिचा मृतदेह वाहनात टाकला आणि राजस्थानच्या दिशेने जात असताना वाटेत एका निर्जन ठिकाणी मृतदेहावर पेट्रोल टाकला आणि तिला जाळून टाकले. त्यानंतर संशयित पुन्हा जामखेडला परतले.

या प्रकरणात पोलिसांनी सरफराज उर्फ शफीक अलीम मोमीन (वय ३८), आरिफ उर्फ खुज्या आसिफ शेख (वय ३१), लक्ष्मी बालाजी पवार (वय ३०, तिघे रा. कळंब), आणि स्वाती उर्फ आरती गणेश कुन्हाडे (वय २८, रा. जामखेड) यांना ताब्यात घेतले असून, गुन्ह्यात वापरलेली कार व मोबाईल जप्त करण्यात आले आहेत. या प्रकरणातील इतर दोन आरोपींचा शोध पोलीस घेत असून अधिक तपास सुरू आहे.