जनगणना कर्तव्यात कसूर पडली महागात! लोणी काळभोरमध्ये पाच शिक्षकांवर गुन्हा दाखल; प्रशासनाचा दणका!

लोणी काळभोर (पुणे): केंद्र सरकारच्या महत्त्वाकांक्षी 'जनगणना २०२७' मोहिमेत सहभागी होण्यास टाळाटाळ करणाऱ्या पाच शिक्षकांविरोधात लोणी काळभोर पोलीस ठाण्यात गुन्हा दाखल करण्यात आला आहे. तहसील प्रशासनाने दिलेल्या आदेशांचे वारंवार उल्लंघन केल्यामुळे ही कठोर कायदेशीर कारवाई करण्यात आली आहे.

प्रकरणाची पार्श्वभूमी:
शिक्षकांची नावे: गुन्हा दाखल करण्यात आलेल्या शिक्षकांमध्ये शिल्पा राजाभाऊ येरमाळकर, सुनिल दिलीप शेळके, शिवाजी संभाजी गायकवाड, प्रदीप बबन पारधी आणि शन्नो जॉक्सन गगादे यांचा समावेश आहे.

नेमके काय घडले? लोणी काळभोर तहसील कार्यालयाकडून या शिक्षकांची जनगणना २०२७ च्या कामासाठी नियुक्ती करण्यात आली होती. चार्ज ऑफिसर तथा तहसीलदार तृप्ती कोलते-पाटील यांनी त्यांना प्रत्यक्ष कामावर हजर राहण्याचे लेखी आदेश दिले होते. मात्र, हे आदेश मिळूनही संबंधित शिक्षकांनी वारंवार पाठ फिरवली आणि काम करण्यास स्पष्ट नकार दिला.

प्रशासनाचा पवित्रा: जनगणना हे एक राष्ट्रीय कर्तव्य असून त्यात कोणत्याही प्रकारचा अडथळा खपवून घेतला जाणार नाही, अशी भूमिका तहसील प्रशासनाने घेतली होती. अखेर, ग्राम महसूल अधिकारी अमोल नवनाथ गव्हाणे यांनी लोणी काळभोर पोलीस ठाण्यात फिर्याद दिली.

कायदेशीर कारवाई:या प्रकरणी पाचही शिक्षकांविरोधात जनगणना अधिनियम १९४८ च्या कलम ११ अन्वये गुन्हा दाखल करण्यात आला आहे. सध्या लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी या प्रकरणाचा अधिक तपास करत आहेत. प्रशासनाने यापूर्वीच स्पष्ट केले होते की, राष्ट्रीय कामात हलगर्जीपणा करणाऱ्या कर्मचारी किंवा अधिकाऱ्यांवर निलंबन आणि फौजदारी स्वरूपाची कारवाई केली जाईल. या कारवाईमुळे इतर कर्मचाऱ्यांमध्येही खळबळ उडाली आहे