शिरूर: भीषण हत्याकांडाचा ३६ तासांत छडा: जुन्या वादाचा वचपा काढण्यासाठी अल्पवयीन मुलाने घेतला शेतकऱ्याचा जीव!

पुणे: शिरूर तालुक्यातील वरूडे गावातील रानमळा परिसरात एका शेतकऱ्याची अत्यंत निर्घृण हत्या झाल्याची धक्कादायक घटना समोर आली आहे. बाळासो बबन तांबे (वय ४३) असे मृत शेतकऱ्याचे नाव आहे.

नेमकी घटना काय? बाळासो तांबे हे उकाड्यामुळे ८ जून रोजी रात्री घराबाहेरील ओट्यावर झोपले होते. रात्रीच्या वेळी अज्ञात व्यक्तीने त्यांच्या गळ्यावर धारदार कोयत्याने सपासप वार करून त्यांची हत्या केली. रक्ताच्या थारोळ्यात पडलेला त्यांचा मृतदेह पाहून परिसरात एकच खळबळ उडाली. घटनेच्या वेळी त्यांच्यासोबत त्यांच्या वृद्ध आई देखील झोपल्या होत्या, मात्र त्यांना काहीच समजले नाही. सकाळी हा प्रकार उघडकीस आल्यानंतर तातडीने पोलिसांना पाचारण करण्यात आले.

 

पोलिसांची कारवाई: शिक्कापूर पोलीस आणि स्थानिक गुन्हे शाखेने (LCB) या प्रकरणाचा तपास करत अवघ्या ३६ तासांत या गुन्ह्याचा छडा लावला आहे.
याप्रकरणी एका अल्पवयीन मुलाला ताब्यात घेण्यात आले आहे. तपासात असे समोर आले की, दोन वर्षांपूर्वी बाळासो तांबे आणि या अल्पवयीन मुलामध्ये कडाक्याचे भांडण झाले होते.

नुकताच पुन्हा एकदा त्यांच्यात वाद झाला होता, याच जुन्या रागातून आणि सूडाच्या भावनेतून त्याने ही हत्या केल्याची कबुली दिली आहे.