नाशिक: रोड आणि सिडकोत तोतया पोलिसांचा उच्छाद; भरदिवसा नागरिकांना चकमा देत साडेपाच तोळे सोने लांबवले

नाशिक: परिसरात तोतया पोलिसांकडून जबरी लूटीच्या घटना पुन्हा सुरू झाल्या आहेत. आर्टिलरी सेंटररोडकडून मधल्या रस्त्याने दत्तमंदिराकडे जाणाऱ्या अंतर्गत रस्त्यावर तोतया पोलिसांनी एका ज्येष्ठ नागरिकाला अडवून अंगावरील सोनसाखळी, अंगठी काढून ठेवण्यास सांगून हातचलाखीने लांबविल्याची घटना रविवारी (दि.६) घडली. याप्रकरणी दिलीप कचरदास संकलेचा (६८, रा. संकलेचा हाउस) यांनी दिलेल्या तक्रारीवरून उपनगर पोलिसांनी जबरी चोरीचा गुन्हा दाखल केला आहे.

दत्तमंदिर रोडवरील स्नेह मंदिर सोसायटी शेजारील संकलेचा हाऊसमध्ये राहणारे ज्येष्ठ बांधकाम व्यावसायिक दिलीप संकलेचा हे नेहमीप्रमाणे रविवारी सकाळी मॉर्निंग वॉक करून मित्रांसमवेत चहापाणी || घेऊन घराकडे परतत होते. चोरडीया यांच्या कारमधून ते सुराणा हॉस्पिटलजवळ उतरले. तेथून ते चालत जात असताना त्यांच्या पाठीमागून हेल्मेट परिधान करून आलेल्या दुचाकीस्वारांनी त्यांना अडविले, 'सध्या चोऱ्यांचे प्रकार खूप वाढल्याने अंगावरील दागिने काढून ठेवा' असे सांगितले. यावेळी हातचलाखीने त्यांनी दागिने घेऊन पलायन केले. उपनगर पोलीस ठाण्यात संकलेचा यांच्या फिर्यादीवरून अज्ञात दुचाकीस्वारांवर गुन्हा दाखल झाला आहे.

पहिला डाव फसला
फिर्यादी संकलेचा यांची लूट करण्याच्या काही मिनिटांपूर्वी याच दोन तोतया पोलिसांनी आर्टिलरी सेंटररोडवर एका महिलेला अडवून फसविण्याचा प्रकार केला. मात्र त्या महिलेच्या अंगावर सोन्याचे दागिने नसल्याने त्यांचा प्रयत्न फसला; मात्र ते हेल्मेटधारी दुचाकीस्वार तेथील एका दुकानाच्या सीसीटीव्हीत कैद झाले.

कागदाची पुडी हाती देत ठोकली धूम
अनोळखी व्यक्तींच्या बोलण्यावर संकलेचा यांनी विश्वास ठेवून गळ्यातील दोन तोळ्याची सोनसाखळी, रत्नजडीत एक तोळ्याची अंगठी असे सुमारे सहा लाखांचे दागिने घेऊन कागदाच्या पुडीची हातचलाखीने अदलाबदल करत धूम ठोकली. संकलेचा जेव्हा घरी पोहचले, तेव्हा त्यांनी तो कागद उघडून बघितला असता त्यामध्ये लहान दगडी खडे आढळून आले.

'पुढे खून झाला आहे, दागिने बॅगेत ठेवा' सांगून केले गायब
'पुढे खून झाला आहे. पोलिसांची तपासणी सुरू आहे. 'तुमच्या गळ्यातील सोने काढून बॅगेत ठेवा,' असे सांगत दोन तोतया पोलिसांनी वृद्ध महिलेची दिशाभूल करून तिच्या गळ्यातील सुमारे अडीच तोळे सोन्याचे - दागिने हातचलाखीने लांबविले. रविवारी (दि. ६) सकाळी साडेसात वाजता अश्विननगर भागात ही जबरी - चोरी झाली. याप्रकरणी फिर्यादी स्मिता मिस्त्री (६३) यांनी दिलेल्या फिर्यादीवरून अंबड पोलिसांनी जबरी लुटीचा गुन्हा दाखल केला आहे. सकाळी कामावर जाण्यासाठी नेहमीप्रमाणे मिस्त्री या घरातून बाहेर पडल्या. वाटेत रिक्षा थांब्याजवळ त्यांना दोघा जणांनी 'आम्ही पोलीस आहोत, पुढे खून झालेला आहे. तपासणी सुरू असून, तुमच्या गळ्यातील सोन्याचे दागिने काढून सुरक्षितपणे गुंडाळून ठेवा' असे सांगून गळ्यातील सोन्याचे दागिने काढून कागदात अथवा वस्तूमध्ये गुंडाळून ठेवण्याचा बनाव करत हातचलाखीने लंपास केले. काही वेळाने दागिने तपासले असता अडीच तोळे सोन्याचे दागिने गायब असल्याचे त्यांच्या लक्षात आले.