आता एटीएम आणि UPI द्वारे काढता येणार पीएफचे पैसे; जाणून घ्या नवीन नियमनवी दिल्ली:कर्मचारी भविष्य निर्वाह निधी संघटनेने (EPFO) आपल्या कोट्यवधी सदस्यांसाठी एक अत्यंत महत्त्वाचे पाऊल उचलले आहे.

EPFO 3.0 या नवीन प्रणालींतर्गत आता कर्मचाऱ्यांना त्यांच्या पीएफ खात्यातून पैसे काढण्यासाठी लांबच लांब रांगा लावण्याची किंवा अनेक दिवस वाट पाहण्याची गरज उरणार नाही. आता थेट UPI आणि एटीएमद्वारे काही मिनिटांत पीएफचा निधी मिळवता येणार आहे.काय आहे नवीन सुविधा?

EPFO ने आपल्या तंत्रज्ञानात मोठे बदल केले असून बँकिंग प्रणालीप्रमाणे सेवा देण्याचा निर्णय घेतला आहे. या नवीन अपडेटमुळे कर्मचारी त्यांच्या पीएफ खात्यातील शिल्लक रक्कम (Balance) देखील UPI ॲपच्या मदतीने तपासू शकतील.

तसेच, गरजेच्या वेळी थेट एटीएममधून पैसे काढता यावेत यासाठी विशेष पीएफ-एटीएम कार्ड देण्याचीही शक्यता वर्तवण्यात आली आहे.

पैसे काढण्याचे नियम आणि मर्यादा:
१. ५० ते ७५ टक्के मर्यादा: भविष्यातील सुरक्षिततेसाठी कर्मचाऱ्यांना त्यांच्या एकूण शिलकीपैकी एका वेळी जास्तीत जास्त ५० ते ७५ टक्के रक्कमच UPI किंवा एटीएमद्वारे काढता येईल. उर्वरित २५ टक्के रक्कम निवृत्तीसाठी खात्यात सुरक्षित ठेवली जाईल.
२. ऑटो-सेटलमेंट मर्यादा वाढली: यापूर्वी ऑटो-सेटलमेंटची मर्यादा १ लाख रुपये होती, ती आता वाढवून ५ लाख रुपये करण्यात आली आहे. यामुळे शिक्षणासाठी किंवा लग्नासाठी लागणारा निधी काही तासांत उपलब्ध होऊ शकेल.
३. नियोजनाची गरज नाही: आता पैसे काढण्यासाठी नियोक्त्याच्या (Employer) मंजुरीची वाट पाहण्याची गरज नाही, कारण ही संपूर्ण प्रक्रिया आधार-ओटीपी आधारित असेल.

या अटी पूर्ण करणे आवश्यक: या सुविधेचा लाभ घेण्यासाठी कर्मचाऱ्यांचा UAN (Universal Account Number)
सक्रिय असणे अनिवार्य आहे. तसेच, UAN शी आधार, पॅन, बँक खाते आणि IFSC कोड लिंक असणे गरजेचे आहे. ज्या कर्मचाऱ्यांची KYC प्रक्रिया पूर्ण आहे, त्यांनाच या वेगवान सुविधेचा लाभ मिळेल.

नियोक्ता आणि कर्मचाऱ्यांना फायदा: EPFO ने देशातील ३२ प्रमुख सार्वजनिक आणि खासगी बँकांसोबत भागीदारी केली आहे. यामुळे पीएफचे योगदान जमा करणे आणि क्लेम सेटल करणे पूर्वीपेक्षा अधिक सोपे आणि जलद होणार आहे.