Earthquake in Nepal : नेपाळमध्ये मध्यरात्री मोठा भूकंप, शेकडो इमारती कोसळल्या; आतापर्यंत ७० जणांचा मृत्यू

Earthquake in Nepal : भारताचा शेजारी देश असलेल्या नेपाळ पुन्हा एकदा भुकंपाने हादरला आहे. शुक्रवारी मध्यरात्री नेपाळमध्ये ६.४ रिश्टर स्केल तीव्रतेचा मोठा भूकंप झाला आहे. यामध्ये शेकडो इमारतींची पडझड झाली असून घटनेत आतापर्यंत ७० जणांचा मृत्यू झाल्याची माहिती आहे. तर अनेक जण जखमी झाले आहेत. नेपाळच्या पीएमओ कार्यालयानेही ट्विट करुन नेपाळमधील भूकंपाची माहिती दिली आहे. 

सध्या बचावकार्य सुरू असून मृतांच्या आकड्यात वाढ होण्याची शक्यता आहे. नेपाळच्या उत्तरी-पश्चिम जिल्ह्यांमध्ये भूकंपामुळे मोठी जीवितहानी झाली आहे. रुकूम पश्चिम जिल्ह्यात ३६ आणि जाजरकोट येथे २० जणांचा मृत्यू झाल्याची प्राथमिक माहिती आहे, जखमींची संख्याही मोठी असल्याचे समजते.

Maratha Reservation : मनोज जरांगे यांच्या आंदोलनाला मोठं यश, सरकारकडून महत्वाची मागणी मान्य; मंत्री GR घेऊन रुग्णालयात

नेपाळच्या  PMO कार्यालयानेही ट्वीट करुन घडलेल्या घटनेबाबत शोक व्यक्त केला आहे. तसेच बचाव पथकांना घटनास्थळी पाठवल्यात आल्याचे सांगितले. नेपाळच्या राष्ट्रीय भूकंप मापन केंद्रानुसार, नेपाळच्या जाजरकोट जिल्ह्यातील लामिडांडा भागात भूकंपाचा केंद्रबिंदू होता.

या भूकंपाची तीव्रता इतकी भीषण होती, की यामध्ये शेकडो इमारती कोसळल्या आहेत. या दुर्घटनेत आतापर्यंत ७० जणांचा मृत्यू झाला असून ढिगाऱ्याखाली दबल्यामुळे अनेक जण गंभीर जखमी झाले आहेत. जखमींना तातडीने उपचारासाठी रुग्णालयात दाखल करण्यात आले आहे.

दरम्यान, या भूकंपाचे धक्के दिल्ली-एनसीआरसह उत्तर प्रदेश आणि बिहारमध्येही जाणवले आहेत. येथील नागरिक भीतीपोटी घरातून बाहेर निघाले. सुदैवाने यात कोणतीही जीवित किंवा वित्तहानी झाली नाही.दिल्ली-एनसीआरपर्यंत ६० सेकंदांपर्यंत भूकंपाचे धक्के जाणवत होते, असे काही नागरिकांनी सांगितले. याआधी २२ ऑक्टोबर २०२३ रोजी दिल्लीत भूकंपाचे तीव्र धक्के बसले होते.