गल्लीबोळीत मोकाट कुत्र्यांचा हैदोस; शेल्टर हाऊस हवेत; निर्बीजीकरणाचा दावा फोल, ५० लाखांचा निधी गेला कुठे?

बीड : रात्रीची वेळ... बीड शहरातील मुख्य रस्ते आणि गल्लीबोळीत शुकशुकाट पसरलेला असतो. अशा भयावह शांततेत अचानक आठ-दहा मोकाट कुत्र्यांची एक हिंस्त्र टोळी भुंकत एखाद्या दुचाकीस्वाराच्या अंगावर धावून जाते. तो आपला जीव वाचवण्यासाठी गाडी वेगात पळवतो, आणि थोडक्यात अनर्थ टळतो. दुसऱ्या दिवशी सकाळी शाळेत जाणाऱ्या एका निष्पाप चिमुकल्यावर हीच कुत्र्यांची टोळी बेसावध क्षणी हल्ला करते. हे कुठल्या भयकथेतील दृश्य नाही, तर बीड शहरात दररोज घडणारे जीवघेणे आणि भयंकर वास्तव आहे! बीडकरांच्या उंबरठ्यावर साक्षात मृत्यू कुत्र्यांच्या रूपाने दबा धरून बसला आहे, आणि शहरातील नागरिकांचे रक्षण करण्याची पूर्ण जबाबदारी असलेली नगरपालिका मात्र कुंभकर्णी झोपेत ढेंगाळत आहे. कुत्र्यांच्या उच्छादामुळे शहरात एक अघोषित संचारबंदी लागू झाल्यासारखी भयानक स्थिती निर्माण झाली आहे.

बीड शहरामध्ये मोकाट कुत्र्यांचा उपद्रव दिवसेंदिवस इतका वाढला आहे की, लहान मुले, वृद्ध, महिला तसेच रात्री-अपरात्री ये-जा करणारे कामगार आणि नागरिक यांच्या सुरक्षेचा प्रश्न ऐरणीवर आला आहे. शहराच्या प्रत्येक वॉर्डात, गल्लीत आणि चौकात मोकाट कुत्र्यांचे नवे झुंड तयार झाले असून पादचाऱ्यांवर ते चाल करून जातात. नागरिक नगरपालिकेच्या कारभारावर तीव्र संताप व्यक्त करत आहेत, कारण प्रशासनाकडून कुत्र्यांच्या निर्बीजीकरणासाठी (Sterilisation) कोट्यवधी रुपयांचा खर्च केल्याचा दावा केला जात असला, तरी प्रत्यक्षात वास्तवात कोणतीही सुधारणा झालेली नाही.

स्थानिक नागरिकांच्या मते, नगरपालिकेने मोकाट कुत्र्यांच्या समस्येवर नियंत्रण मिळवण्यासाठी मंजूर करण्यात आलेला तब्बल ५० लाखांचा निधी नेमका कुठे गेला, असा संतप्त सवाल उपस्थित केला आहे. एवढा मोठा निधी मंजूर होऊनही प्रत्यक्षात प्राण्यांसाठी 'शेल्टर हाऊस' (Shelter House) किंवा निर्बीजीकरण केंद्राचे काम अजूनही कागदावरच असून प्रत्यक्षात कुठेही सुरू झालेले नाही. परिणामी, कुत्र्यांची संख्या वेगाने वाढत असून नागरिकांचे जगणे मुश्कील झाले आहे. नगरपालिकेने या गंभीर समस्येची तात्काळ दखल घेऊन प्रभावी पावले उचलावीत आणि नागरिकांना या त्रासापासून मुक्ती मिळवून द्यावी, अशी जोरदार मागणी आता बीडकरांकडून केली जात आहे.