वर्दी'ला पुन्हा कलंक! शिरूरमध्ये ९५ हजारांची लाच स्वीकारताच एसीबीच्या चाहूलने हवालदार रकमेसह पसार

पुणे: एका दाखल गुन्ह्यामध्ये अटक न करण्यासाठी तक्रारदाराकडून ९५ हजार रुपयांची लाच घेताना शिरूर पोलिस ठाण्यातील हवालदार सतीश नाथाराव मुंढे (वय ४५) लाचलुचपत प्रतिबंधक विभागाच्या (एसीबी) जाळ्यात अडकला. मात्र, ही लाच स्वीकारल्यानंतर लाचलुचपत प्रतिबंधक विभागाच्या (एसीबी) पथकाची चाहूल लागताच हवालदार मुंढे लाचेच्या रकमेसह घटनास्थळावरून पसार झाला असून, यामुळे पोलिस वर्तुळात मोठी खळबळ उडाली आहे.

मिळालेल्या सविस्तर माहितीनुसार, शिरूर पोलिस ठाण्यात दाखल असलेल्या एका गुन्ह्यामध्ये तक्रारदाराला किंवा त्याच्या संबंधित व्यक्तीला अटक करू नये आणि दाखल गुन्ह्यात मदत करावी यासाठी पोलिस हवालदार सतीश मुंढे याने सुरुवातीला एक लाख रुपयांच्या लाचेची मागणी केली होती. मात्र, तडजोड झाल्यानंतर ९५ हजार रुपये देण्याचे ठरले. तक्रारदाराची लाच देण्याची अजिबात इच्छा नसल्याने त्यांनी या प्रकरणी लाचलुचपत प्रतिबंधक विभागाच्या (ACB) पुणे कार्यालयात जाऊन रीतसर तक्रार नोंदवली.

तक्रारीच्या अनुषंगाने एसीबीच्या पथकाने पडताळणी केली असता, हवालदार सतीश मुंढे याने लाचेची मागणी केल्याचे निष्पन्न झाले. त्यानुसार सापळा रचून कारवाई करण्याचे ठरवण्यात आले. ठरल्याप्रमाणे हवालदार मुंढे याने तक्रारदाराकडून ९५ हजार रुपयांची लाच स्वीकारली. परंतु, लाच घेतल्यानंतर काही क्षणातच तिथे लाचलुचपत प्रतिबंधक विभागाच्या (ACB) पथकाची चाहूल लागल्याची कुणकुण हवालदार सतीश मुंढे याला लागली. त्यामुळे त्याने सतर्क होत लाचेची ती ९५ हजारांची रक्कम स्वतःकडेच ठेवली आणि पसार झाला. याप्रकरणी पुढील कायदेशीर कारवाई आणि हवालदार मुंढे याचा शोध लाचलुचपत प्रतिबंधक विभागाकडून तीव्रतेने सुरू आहे. या घटनेमुळे शिरूरसह संपूर्ण पुणे जिल्ह्यात पोलिसांच्या कार्यपद्धतीवर आणि भ्रष्टाचारावर तीव्र चर्चा सुरू झाली असून 'वर्दी'ला पुन्हा एकदा कलंक लागल्याची भावना व्यक्त होत आहे.