Pune : पिंपरी चिंचवडच्या इरफानचा विमान अपघातात मृत्यू, 'बकरी ईद' कुटुंबियांसोबतचा ठरला अखेरचा सण

Pune : अहमदाबाद येथे झालेल्या दुर्दैवी विमान दुर्घटनेत महाराष्ट्रामधील १२ ते १३ जणांचा मृत्यू झाला आहे. मुंबई, रायगड, कल्याण, डोंबिवली, नागपूरसह पिंपरी चिंचवडमधील एका व्यक्तीचा समावेश आहे. एअर इंडियाच्या विमानात कॅबिन क्रू असलेल्या २२ वर्षीय इरफान शेख याचा अहमदाबाद दुर्घटनेत मृत्यू झाला. इरफान हा पिंपरी चिंचवड शहरातील आहे. नुकत्याच झालेल्या बकरी ईदच्या सणाला इरफान पिंपरी चिंचवडमध्ये आला होता. हा कुटुंबियांसोबतचा त्याचा अखेरचा सण ठरला. अहमदाबाद विमान दुर्घटनेत २६५ जणांचा मृत्यू झाला. त्यामध्ये केबिन क्रूमध्ये कार्यरत असणाऱ्या इरफानचाही मृत्यू झाला. इरफानसारख्या तरुणाचा अपघाती मृत्यू काळजाला भिडणारा आहे.

इरफान शेख हा आपल्या कुटुंबासोबत पिंपरी चिंचवड शहरातील संत तुकाराम नगर परिसरात वास्तव्यास होता. इरफान शेख हा एअर इंडियाच्या फ्लाइटमध्ये केबिन क्रूमध्ये गेल्या काही दिवसांपासून कार्यरत होता. पण गुरूवारी झालेल्या एअर इंडियाच्या विमान अपघातात त्याचा दुर्दैवी मृत्यू झाला. मुलाच्या दुर्दैवी मृत्यूची बातमी समजताच कुटुंबीयांवर दु:खाचा डोंगर कोसळला. इरफान हा बकरी ईदच्या सणाला पिंपरी चिंचवड शहरात आपल्या कुटुंबीयांच्या भेटीला आला होता. हा सण कुटुंबियांसोबतचा त्याचा अखेरचा सण ठरला.

Air India Emergency Landing : अहमदाबाद अपघाताच्या २४ तासांत एअर इंडियाच्या AI 379 विमानाचं थायलंडमध्ये इमर्जन्सी लँडिंग!

इरफानला एअरलाइन् मध्ये करिअर करायचं होतं. गेल्या काही दिवसांपासून तो एअर इंडियामध्ये क्रू मेंबर म्हणून काम करत होता. उज्जव भविष्याचे स्वप्न पाहणाऱ्या २२ वर्षीय इरफान याच्यावर काळाने घाला घातला. इरफानच्या जाण्याने कुटुंबांच्या मनावर मोठा आघात झाला आहे. काळाने इरफान शेख याला हिरावून घेतल्यामुळे कुटुंबिय दु:खात बुडाले आहेत.

इरफानचं पार्थिव आणण्यासाठी आई आणि भाऊ अहमदाबादकडे रवाना झाले आहेत.डीएनए तपासणी झाल्यानंतरच इरफानचं पार्थिव कुटुंबियांना सुपूर्द करण्यात येणार आहे. तब्बल ७०० फूट उंचीवरून विमान कोसळल्यामुळे मोठा स्फोट झाला अन् सर्वांची क्षणात राखरांगोळी झाली. आतापर्यंत २०० पेक्षा जास्त मृतदेह ताब्यात घेण्यात आलेले आहेत. मृतदेह पूर्णपणे जळलेले असल्यामुळे ओळख पटत नाही. त्यामुळे डीएनए चाचणी करण्यात येत आहे. या विमान दुर्घटनेत आतापर्यंत २६५ जणांचा मृत्यू झाल्याचे वृत्त आहे.