ठाणे: वाढदिवसाचा आनंद ठरला जीवघेणा! ठाण्यात 'थीम केक'मधील धातूच्या पिना ३ वर्षीय चिमुकल्याने गिळल्या; पालकांनो सावधान!

ठाणे: हिरानंदाणी इस्टेट परिसरात राहणाऱ्या एका जीवशास्त्र शिक्षिकेच्या मुलाचा ३१ मे रोजी वाढदिवस होता. या आनंदाच्या प्रसंगी कुटुंबाने मुलासाठी 'बॉलिंग ॲली' थीमचा केक मागवला होता. मात्र, केकच्या सजावटीमध्ये वापरलेल्या धातूच्या पिनांमुळे मुलाचा जीव धोक्यात आला.

नेमके काय घडले? वाढदिवसाच्या पार्टीत मुलाने केकच्या वरच्या भागातील चॉकलेट बॉल्स खाल्ले. मात्र, बेकरी चालकाने चॉकलेट बॉल्सला आधार देण्यासाठी त्यामध्ये धातूच्या तारांचा (Metal Pins) वापर केला होता, ज्याबद्दल पालकांना कोणतीही कल्पना देण्यात आली नव्हती.

धोक्याची जाणीव: पार्टीदरम्यान इतर मोठ्या मुलांच्या हे लक्षात आले की, चॉकलेटच्या आत धातूच्या रॉड्स आहेत. रेयांशनेही ते चॉकलेट खाल्ले असल्याने, त्याने या धातूच्या पिना गिळल्या असाव्यात, अशी भीती कुटुंबीयांना वाटली.रुग्णालयातील ४८ तास: दुसऱ्या दिवशी सकाळी एक्स-रे काढल्यानंतर मुलाच्या लहान
आतड्यात दोन धातूच्या पिना अडकल्याचे दिसून आले. ठाण्यातील ज्युपिटर रुग्णालयातील डॉक्टरांनी शस्त्रक्रिया टाळण्याचा सल्ला दिला आणि पिना नैसर्गिकरीत्या बाहेर पडण्याची वाट पाहण्यास सांगितले. ४८ तासांच्या अथक चिंतेनंतर सुदैवाने त्या पिना नैसर्गिकरीत्या शरीराबाहेर पडल्या आणि मोठा अनर्थ टळला.

पालकांसाठी इशारा: ही घटना सोशल मीडियावर शेअर करत स्नेहा शेलार यांनी सर्व पालकांना सावधानतेचा इशारा दिला आहे. केक किंवा खाद्य सजावटीमध्ये धातूचे तुकडे किंवा सपोर्टिंग वायर वापरली आहे का, याची खात्री करण्याचे आवाहन त्यांनी केले आहे.या प्रकरणी पोलीस आणि एफडीए (FDA) प्रशासनाकडे तक्रार करण्यात आली आहे. अशा प्रकारे खाद्यपदार्थांमध्ये धोकादायक वस्तूंचा वापर करणे अत्यंत बेजबाबदारपणाचे असल्याचे मत व्यक्त होत आहे.