मोबाईलच्या नादात हरपलं भान! चौथ्या मजल्यावरून पडून १७ वर्षीय तरुण गंभीर जखमी; नाशिकमधील धक्कादायक घटना

नाशिक: हातात मोबाईल आणि डोळ्यासमोर इंटरनेटचे आभासी जग... याच धुंदीत सभोवतालच्या धोक्याचे भान हरपल्याने नाशिकमध्ये एका १७ वर्षीय तरुणाचा भीषण अपघात झाला आहे. घराच्या बाल्कनीत उभे राहून मोबाईलवर सर्फिंग करत असताना अचानक तोल गेल्याने हा तरुण थेट चौथ्या मजल्यावरून खाली कोसळला.

नेमकी घटना काय?
मिळालेली माहिती अशी की, अरबाज सलीम खान (वय १७) हा तरुण नाशिकच्या भद्रकाली परिसरातील शिंगाडा तलाव जवळील म्हसोबावाडीत राहतो. रविवारी सकाळी साडेदहाच्या सुमारास अरबाज आपल्या घराच्या बाल्कनीत मोबाईल पाहत उभा होता. तो मोबाईलमध्ये इतका मग्न होता की, त्याला आपण बाल्कनीच्या अगदी टोकाला आहोत याचे भान राहिले नाही. त्याच वेळी अचानक त्याचा तोल गेला आणि तो थेट खाली कोसळला.

प्रकृती चिंताजनक:
चौथ्या मजल्यावरून पडत असताना अरबाज मधल्या मजल्यावरील एका पत्र्याच्या शेडवर आदळला आणि त्यानंतर जमिनीवर पडला. पत्र्याचा मोठा आवाज आणि अरबाजचा आक्रोश ऐकून शेजारी राहणाऱ्या ध्रुगेश यादव यांनी तातडीने मदतीसाठी धाव घेतली. रक्ताच्या थारोळ्यात पडलेल्या अरबाजला तातडीने जिल्हा शासकीय रुग्णालयात दाखल करण्यात आले.

अतिदक्षता विभागात उपचार:
या भीषण अपघातात अरबाजच्या डोक्याला, छातीला आणि पायाला गंभीर दुखापत झाली आहे. सध्या त्याची प्रकृती चिंताजनक असून, त्याच्यावर अतिदक्षता विभागात (ICU) उपचार सुरू आहेत. घटनेच्या वेळी त्याचे कुटुंबीय कामासाठी बाहेर गेले होते.

पोलिसांचा तपास:
या घटनेची माहिती मिळताच भद्रकाली पोलिसांनी घटनास्थळाचा पंचनामा केला आहे. मोबाईलमध्ये अति मग्न असल्यामुळेच हा अपघात झाल्याचा प्राथमिक निष्कर्ष पोलिसांनी काढला आहे.

या घटनेमुळे परिसरात हळहळ व्यक्त होत असून, मोबाईल वापरताना सुरक्षिततेचे भान ठेवणे किती महत्त्वाचे आहे, हे पुन्हा एकदा अधोरेखित झाले आहे.