पुणे: ६ वर्षांनंतर अखेर न्याय मिळाला; पुण्याच्या बुधवार पेठेत २२ वर्षीय प्रेयसीच्या खून प्रकरणात नराधम प्रियकराला जन्मठेपेची शिक्षा

पुणे: बुधवार पेठेत देहविक्रयाचा व्यवसाय करणाऱ्या तरुणीच्या प्रेमात पडला. मात्र, दोघांमध्ये वाद झाला आणि त्याने तिचा निर्घण खून केला. प्रेयसीच्या हत्येप्रकरणी प्रियकराला न्यायालयाने जन्मठेप आणि ५० हजार रुपये दंडाची शिक्षा सुनावली. तरुणीला वाचविण्यासाठी आरोपीकडून चाकू हिसकावून घेताना जखमी झालेले पोलिस अंमलदारांसह प्रत्यक्षदर्शी साक्षीदारांनी नोंदविलेली साक्ष खटल्यात महत्त्वाची ठरली. अतिरिक्त सत्र न्यायाधीश रजनी क्षीरसागर यांनी हा निकाल दिला. सुखदेव रामदास मडावी (वय ३४, रा. वडरवाडी, मूळ रा. यवतमाळ) याला न्यायालयाने दोषी ठरविले.

संबंध तोडल्याच्या वादातून त्याने २२ वर्षीय तरुणीचा खून केला होता. ही घटना २३ मे २०१७ रोजी रात्री नऊ ते दहाच्या सुमारास बुधवार पेठेतील जनता बिल्डिंग आणि फूड प्लाझा हॉटेल परिसरात घडली. बुधवार पेठेत देहविक्रयाचा व्यवसाय करणा-या तरुणीशी आरोपीचे प्रेमसंबंध होते. घटनेच्या दिवशी आरोपी सुखदेवचा तिच्याशी वाद झाल्याने रागाच्या भरात आरोपीने तरुणीच्या छातीवर आणि पोटात वार केले. या हल्ल्यात गंभीर जखमी झालेल्या तरुणीचा उपचारांपूर्वी मृत्यू झाला.

ही घटना पाहून गस्तीवर असलेले फरासखाना ठाण्याचे तत्कालीन अंमलदार सुहास साळुंखे यांनी आरोपीला पकडण्याचा प्रयत्न केला. त्याच्याकडून चाकू हिसकावताना झालेल्या झटापटीत साळुंखे यांच्या बोटांना दुखापत झाली; तर पळून जाण्याच्या प्रयत्नात आरोपी पायऱ्यांवरून घसरून पडला. साळुंखे यांनी दुसऱ्या पोलिस अंमलदाराच्या मदतीने आरोपीला ताब्यात घेतले. या प्रकरणी फरासखाना पोलिस ठाण्यात गुन्हा दाखल झाल्यावर आरोपीविरोधात आरोपपत्र दाखल करण्यात आले.

या खटल्यात अतिरिक्त सरकारी वकील नामदेव तरळगट्टी आणि अँड. देवतरसे यांनी चौदा साक्षीदार तपासले. त्यामध्ये आरोपीला पकडणारे पोलिस अंमलदार, प्रत्यक्षदर्शी साक्षीदार आणि वैद्यकीय अधिकाऱ्यांची साक्ष महत्त्वाची ठरली. बचाव पक्षाने आरोपीला खोट्या प्रकरणात अडकवल्याचा दावा केला होता; मात्र न्यायालयाने सरकारी पक्षाचा युक्तिवाद आणि पुरावे ग्राह्य धरत आरोपीला जन्मठेप ठोठावली.