छत्रपती संभाजीनगर: बीड बायपासवरील जाबिंदा ग्राउंडजवळ तरुणाला चाकूचा धाक दाखवून सोन्याची साखळी लूटली

छत्रपती संभाजीनगरः बीड बायपास रस्त्यावरील जबिंदा ग्राउंडजवळ मृत्युमुखी पडलेल्या कुत्र्याच्या पिल्लाला पुरण्यासाठी गेलेल्या दोन मित्रांवर तीन गुन्हेगारांनी प्राणघातक हल्ला करून लुटले. लुटारूंनी लोखंडी गज आणि चाकूचा धाक दाखवत दोन तोळ्यांची सोनसाखळी, बुलेटची चावी हिसकावून पळ काढला. ३ ऑगस्टला मध्यरात्री १ वाजता घडलेल्या घटनेप्रकरणी सातारा ठाण्यात गुन्हा दाखल करण्यात आला.

मूळ नांदेडमधील प्रेम किशोर रेणापूरकर (२३) हा एका रुग्णालयात फिजिओथेरपिस्ट म्हणून इंटर्नशिप करत आहे. ३ ऑगस्टला मध्यरात्री १२.३० वाजेच्या सुमारास प्रेम आणि त्याचा मित्र प्रथमेश कुंटूरवाल हे दोघे आपल्या दुचाकीने जबिंदा ग्राउंड परिसरात गेले होते. त्यांच्या घराजवळ आजारी असलेले कुत्र्याचे पिल्लू अचानक मृत पावल्याने, त्याला सुरक्षित ठिकाणी पुरण्यासाठी ते या निर्जन ठिकाणी आले होते. त्याच वेळी पिवळ्या रंगाच्या मोपेडवरून २० ते २२ वयोगटातील तीन अज्ञात तरुण तेथे पोहोचले. त्यातील एकाने मोपेड चालूच ठेवली, तर उर्वरित दोघांनी खाली उतरून प्रेम व प्रथमेशला घेरून दमदाटी करण्यास सुरुवात केली.

लोखंडी गज अन् चाकूने धमकावले
खाली उतरलेल्या दोघांनी लोखंडी गज, चाकूचा धाक दाखवून प्रेमच्या गळ्यातील दोन तोळ्यांची सोनसाखळी बळजबरीने हिसकावून काढली. तसेच पाठलाग करू नये, म्हणून बुलेटची चावीही काढून घेतली. प्रथमेशने मोबाइल फोनमधून लुटारूंचा आणि त्यांच्या गाडीचा फोटो काढण्याचा प्रयत्न केला. हे लक्षात येताच पळून जाणाऱ्या लुटारूंनी थांबून प्रथमेशच्या पाठीवर मोठा दगड फेकून मारला. यात तो जखमी झाला. घटनेनंतर तरुणांनी सातारा पोलिसांकडे जात तक्रार दिली. पोलिस उपनिरीक्षक नंदकुमार भंडारे अधिक तपास करत आहेत.