Pune : कोरेगाव पार्क जमीन व्यवहारातील शीतल तेजवानी आधीपासूनच वादग्रस्त; नव्या खुलासांनी चक्रावून टाकलं

Pune : कोरेगाव पार्क येथील 40 एकर भूखंड लाटल्याप्रकरणी धक्कादायक माहिती समोर येत आहे. या प्रकरणात राज्याचे उपमुख्यमंत्री अजित पवार यांचे पुत्र पार्थ पवार आणि पार्थ यांचे मामेभाऊ दिग्विजय पाटील हे दोघे पार्टनर आहेत. पार्थ पवार आणि दिग्विजय पाटील यांच्या अमेडिया कंपनीने हा संपूर्ण व्यवहार केला आहे. याप्रकरणी आता सहजिल्हा निबंधक (वर्ग १) संतोष अशोक हिंगाणे यांनी बावधन पोलिस ठाण्यात दिलेल्या तक्रारीनुसार, जमीन विक्रेत्या शीतल तेजवानी, अमेडिया कंपनीतील भागीदार दिग्विजय पाटील आणि सह दुय्यम निबंधक रवींद्र तारु यांच्यावर गुन्हा नोंद करण्यात आला आहे.

पार्थ पवार यांच्या अमेडिया कंपनीला ही जमीन विकणारी शितल तेजवानी हिच्याबद्दल आता चक्रावून टाकणारी माहिती समोर आली आहे. या संपूर्ण व्यवहारात शितल तेजवानी ही अत्यंत महत्त्वाचं पात्र आहे. हा 40 एकराचा भूखंड बॉटनिकल सर्व्हे ऑफ इंडियाच्या ताब्यात होता. पुण्यातील ही जमीन सरकारच्या ताब्यातून सोडवणं आणि त्याच्या विक्रीसाठी कधीही रद्द न होणारी पॉवर ऑफ अटर्नी तेजवानी हिने मूळ 272 मालकांना शोधत नाममात्र 10 ते 15 हजार रुपये देऊन करून घेतली होती. त्यामुळे हा व्यवहार करताना शितल तेजवानी हिने अतिशय थंड डोक्याने सगळा प्लॅन आपला होता.

Mumbai : म्हाडाचं घर मिळवण्याच्या नादात कोट्यवधींचा गंडा; डॉक्टरांसह PSIची फसवणूक, अर्ज करताना काय घ्याल काळजी

कधीही रद्द न होणारी पावर ऑफ अटर्नी शितल तेजवानी हिच्या नावावर झाल्यावर तिला 2025 साली एक मोठा मासा दिसला आणि तो होता अमेडिया कंपनी. ज्यावेळेस शीतल तेजवानी हिने अमेडिया कंपनीची माहिती घेतली त्यावेळेस तिला या अमेडिया कंपनीतील भागीदारांचे नाव समजली आणि तिने सगळा प्लॅन आखला. या अमेडिया कंपनीमध्ये 99 टक्के भागीदारी होती ती अजित पवार यांचे पुत्र पार्थ पवार आणि एक टक्का भागीदारी होती ती सुनेत्रा पवार यांचे भाचे दिग्विजय पाटील यांची. हे गिऱ्हाईक हेरल्यानंतर पुढील सगळा गैरव्यवहार करण्यात आला. मात्र या शितल तेजवानीचा इतिहास हा घोटाळ्याचाच राहिलेला आहे.

शितल तेजवानी हिचा पती सागर सूर्यवंशी हा सेवा विकास सहकारी बँकेच्या घोटाळ्यातील आरोपी आहे. सागरवर ईडीची चौकशी सुद्धा लागली होती. मात्र त्या प्रकरणात पुढे काहीच झाले नाही. फक्त घोटाळेबाजच नाही तरी सागर आणि शीतल यांच्यावर 100 कोटींच्या घरात विविध कर्ज देखील आहेत.

सागर सूर्यवंशीनं रेणुका लॉन्सच्या नावे 2 वेगवेगळी वाहन कर्ज घेतली आहेत. यामध्ये 1 कोटी 16 लाख रुपयांचे एक कर्ज आहे तर दुसरे कर्ज हे 2 कोटी 24 लाख रुपयांचे आहे. शीतल तेजवानीने सुद्धा 2 कारसाठी 4 कोटी 80 लाख कर्ज घेतलेलं आहे. इतकंच नाही तर सागर सूर्यवंशी याने सागर लॉन्सच्या नावावर 16 कोटी 48 लाख कॅश क्रेडिट कर्ज देखील घेतलेले आहे. शीतल तेजवानीवर आणखी एक कर्ज 10 कोटींचे कर्ज आहे. या शीतल तेजवानीच्या पॅरामाऊंट इन्फ्रा कंपनीवर 5 कोटी 95 लाखांचं कर्ज आहे. दुसरीकडे रेणुका लॉन्सच्या नावे आणखी 5 कोटी 25 लाखांचं कर्ज आहे. या दोघांचे एकूण कर्ज हे 100 कोटींच्या घरात गेलेलं आहे. त्यामुळे शीतल तेजवानी आणि तिचा पति सागर सूर्यवंशी यांचे अनेक कारनामे पुढे येण्याची शक्यता आहे.

दरम्यान, आता हे कोरेगाव पार्क जमीन गैरव्यवहार प्रकरण उघडकीस आल्यानंतर शीतल सध्या कुठं आहे, काय करते, तिचे कार्यालय कुठे आहे? याबाबत तपशील समोर आलेला नाही. मात्र, या सगळ्या प्रकरणात शीतल तेजवानी ही अत्यंत महत्वाचा पात्र असल्याने तिची चौकशी झाल्यानंतर अमेडिया कंपनी आणि पार्थ पवार यांचे कनेक्शनही उघडकीस येण्याची शक्यता आहे.