धक्कादायक! राष्ट्रवादीचे आमदार अडकले सेक्सटॉर्शनच्या जाळ्यात; 1 लाखाच्या खंडणीची मागणी

पुणे : सोलापूर जिल्ह्यातील मोहोळ विधानसभा मतदारसंघाचे राष्ट्रवादी काँग्रेसचे आमदार यशवंत माने यांना सेक्सटॉर्शनच्या जाळ्यात अडकवण्याचा प्रयत्न केल्याचा धक्कादायक प्रकार समोर आला आहे. माने यांनी पुणे सायबर पोलिस ठाण्यात फिर्याद दिल्यानंतर पोलिसांनी राजस्थानमधील भरतपूर येथून आरोपीला अटक केली.

रिझवान अस्लम खान (वय २४, रा. ग्राम सिहावली महारायपूर, ता. नगर, जि. भरतपूर, राजस्थान) असे अटक केलेल्या आरोपीचे नाव आहे. पोलिसांनी दिलेल्या माहितीनुसार, आमदार माने हे पुण्यात वास्तव्यास आहेत. त्यांना २३ जानेवारी रोजी फेसबुकद्वारे अनोळखी तरूणीचे मेसेज आले होते. त्यांनी याकडे दुर्लक्ष केले.

३१ जानेवारीला फेसबुकवर व्हिडिओ कॉल आल्यानंतर त्यांना संशय आला. परंतु त्यांना सतत आठवडाभर मेसेज येत होते. त्यामुळे त्यांनी रात्री दहाच्या सुमारास तो व्हिडिओ कॉल उचलला. काही सेंकदांसाठी तो कॉल सुरू राहिला. आरोपींनी माने यांच्या व्हॉट्सअॅपवर अश्लील मेसेज आणि व्हिडिओ पाठवून कॉल करुन भूरळ पाडण्याचा प्रयत्न केला.

आरोपीने रेकॉर्ड केलेला व्हिडिओ कॉल माने यांना पाठविला. तसेच, एक लाख रुपये खंडणी न दिल्यास तो व्हिडिओ सोशल मीडियावर व्हायरल करण्याची धमकी दिली. याबाबत माने यांनी पुणे सायबर पोलिस ठाण्यात फिर्याद दिली. त्यावर पोलिसांनी तांत्रिक विश्लेषण करून आरोपी रिझवान खान याला राजस्थानच्या भरतपूर येथून अटक केली. आरोपीच्या मोबाईलमध्ये ९० अश्लील व्हिडिओ आढळून आले आहेत. न्यायालयाने आरोपीला पाच दिवसांची पोलिस कोठडी सुनावली आहे.

पोलिस आयुक्त रितेश कुमार, पोलिस सह आयुक्त संदीप कर्णिक, अतिरिक्त आयुक्त गुन्हे रामनाथ पोकळे, उपायुक्त श्रीनिवास घाडगे, सहायक आयुक्त विजयकुमार पळसुले यांच्या मार्गदर्शनाखाली वरिष्ठ पोलिस निरीक्षक मीनल सुपे-पाटील यांच्या पथकाने ही कारवाई केली. दरम्यान, अश्लील व्हिडिओ व्हायरल करण्याची धमकी दिल्यास सायबर पोलिस ठाण्यात संपर्क साधावा, असे आवाहन पोलिसांनी केले आहे.

सेक्सस्टॉर्शनचा प्रकार ऐकून होतो. पण, मी या धमक्यांना बळी न पडण्याचे ठरवले. तरुणांना ब्लॅकमेल करून लुटले जात असून, असे प्रकार दिवसेंदिवस वाढत आहेत. हा प्रकार खूपच भयानक आहे. पुणे पोलिसांचे मी आभार मानतो. अनवधानाने असा प्रकार घडल्यास नागरिकांनी न घाबरता पोलिसांकडे तक्रार करावी.