सुनेत्रा पवारांची 'दिल्ली वारी'; राज्यसभा सदस्यत्वाचा आज राजीनामा? बारामती विजयानंतर सक्रिय राजकारणात मोठ्या निर्णयाची शक्यता

बारामती विधानसभा पोटनिवडणुकीत दणदणीत विजय मिळवल्यानंतर राष्ट्रवादी काँग्रेसच्या (अजित पवार गट) अध्यक्षा सुनेत्रा पवार आज तातडीने दिल्ली दौऱ्यावर रवाना झाल्या आहेत. एकाच वेळी दोन सभागृहांचे सदस्यत्व भूषवता येत नसल्याने, सुनेत्रा पवार आज राज्यसभेच्या सभापतींकडे आपल्या खासदारकीचा राजीनामा सुपूर्द करण्याची दाट शक्यता आहे. त्यांच्या या निर्णयामुळे राज्याच्या राजकारणात सुनेत्रा पवार आता दिल्ली सोडून मुंबईत सक्रिय होणार, हे स्पष्ट होत आहे.

तांत्रिक अडचण अन् राजकीय दिशा
नुकत्याच झालेल्या पोटनिवडणुकीत सुनेत्रा पवार यांनी आमदार म्हणून ऐतिहासिक विजय मिळवला. मात्र, संविधानाच्या नियमांनुसार एका व्यक्तीला राज्यसभा आणि विधानसभा अशा दोन्ही सभागृहांचे सदस्यत्व एकाच वेळी ठेवता येत नाही. त्यामुळे विधानसभेतील सक्रिय राजकारणावर लक्ष केंद्रित करण्यासाठी त्या आज राज्यसभेचा त्याग करण्याची औपचारिकता पूर्ण करू शकतात. हा राजीनामा केवळ तांत्रिक बाब नसून सुनेत्रा पवार यांच्या पुढील राजकीय भूमिकेचे दिशादर्शन करणारा ठरणार आहे.

भाजपच्या बड्या नेत्यांशी भेट?
दिल्ली दौऱ्यात सुनेत्रा पवार केवळ राजीनामा देऊन थांबणार नाहीत, तर त्या भाजपच्या केंद्रीय नेतृत्वाचीही भेट घेणार असल्याचे समजते. यामध्ये पंतप्रधान नरेंद्र मोदी, केंद्रीय गृहमंत्री अमित शहा आणि भाजप अध्यक्ष नितीन नबीन यांच्याशी त्यांची चर्चा होण्याची चिन्हे आहेत. या भेटींमध्ये आगामी निवडणुकांची रणनीती, महायुतीमधील समन्वय आणि राज्यातील नव्या राजकीय समीकरणांवर खलबतं होण्याची शक्यता आहे.

राजकीय वर्तुळाचे लक्ष सुनेत्रा पवारांच्या निर्णयाकडे
सुनेत्रा पवार यांच्या खासदारकीच्या राजीनाम्यामुळे राज्यसभेतील रिक्त होणाऱ्या जागेवर कुणाची वर्णी लागणार, याची उत्सुकता आता शिगेला पोहोचली आहे. तसेच विधानसभेत सुनेत्रा पवारांच्या वाढत्या सक्रियतेमुळे राज्याच्या सत्तासमीकरणांवर नेमका काय परिणाम होतो, याकडे सर्वच राजकीय पक्षांचे लक्ष लागले आहे. दरम्यान, या दौऱ्याबाबत कोणतीही अधिकृत माहिती अद्याप समोर आलेली नसली, तरी या 'दिल्ली वारी'मुळे राजकीय हालचालींना वेग आला आहे.