काळजाचा ठोका चुकवणारा थरार! चालकाला भोवळ आल्याने ६० प्रवाशांनी भरलेली बस उलटली

नाशिक (मालेगाव): नाशिक-धुळे राष्ट्रीय महामार्गावर बुधवारी सकाळी एक अत्यंत थरारक घटना घडली. शहादा आगाराची पुणे-शहादा ही एसटी बस (MH 14 MH 2310) नेहमीच्या मनमाड-मालेगाव मार्गावर वाहतूक कोंडी असल्याने चांदवडमार्गे मालेगावकडे जात होती. उमराणे गावातील रामदेव बाबा मंदिराजवळ आली असता, चालकाला अचानक भोवळ (चक्कर) आली. यामुळे बसवरील नियंत्रण सुटले आणि ६० प्रवाशांनी भरलेली ही बस रस्त्याच्या कडेला असलेल्या दोन झाडांवर आदळून थेट एका खोलगट भागात पलटी झाली. अपघाताचा आवाज होताच उमराणे परिसरातील स्थानिक नागरिकांनी मोठ्या संख्येने घटनास्थळी धाव घेतली.

प्रसंगावधान राखून त्यांनी बसच्या काचा फोडल्या आणि आत अडकलेल्या ५८ प्रौढ प्रवाशांना व २ चिमुकल्यांना सुखरूप बाहेर काढले. या अपघातात बस चालक राकेश दिलीप बुवा आणि एक प्रवासी गंभीर जखमी झाले असून, इतर १० ते ११ प्रवासी किरकोळ जखमी आहेत. जखमींना तातडीने रुग्णवाहिकेतून मालेगाव येथील सामान्य रुग्णालय व खासगी रुग्णालयात दाखल करण्यात आले आहे. सुदैवाने बसचा वेग मर्यादित असल्याने मोठा अनर्थ टळला.

घटनेची माहिती मिळताच देवळा पोलिसांनी घटनास्थळी धाव घेत पंचनामा केला आहे. उमराणे येथील स्थानिकांनी दाखवलेल्या तत्परतेमुळे ६० प्रवाशांचे प्राण वाचल्याने सर्वत्र त्यांचे कौतुक होत आहे.