NEET पेपर लीकचे पुणे कनेक्शन! ब्युटी पार्लर चालवणारी महिला अटकेत; ताबा सीबीआयकडे सोपवणार

पुणे: देशभरात गाजलेल्या NEET-UG २०२४ पेपर फुटी प्रकरणाचे धागेदोरे आता पुण्यापर्यंत येऊन पोहोचले आहेत. पुणे पोलिसांनी या प्रकरणात एका महिलेला अटक केली असून, तिचे कनेक्शन थेट पेपर लीक घोटाळ्याशी असल्याचे समोर आले आहे. अटक करण्यात आलेली महिला पुण्यात एक ब्युटी पार्लर चालवते, अशी प्राथमिक माहिती मिळाली आहे.

तपास यंत्रणांच्या माहितीनुसार, या महिलेने परीक्षार्थी आणि पेपर लीक करणाऱ्या मुख्य सूत्रधारांमध्ये मध्यस्थ म्हणून काम केल्याचा संशय आहे. पुण्यातील विमानतळ पोलीस ठाण्याच्या हद्दीतून तिला ताब्यात घेण्यात आले आहे. या प्रकरणाचे गांभीर्य लक्षात घेता, आता पुणे पोलीस या महिलेचा ताबा केंद्रीय अन्वेषण विभागाकडे (CBI) सोपवणार आहेत.

NEET परीक्षेतील गैरप्रकाराचा तपास सध्या सीबीआय करत असून, या महिलेच्या अटकेमुळे पुण्यातील आणखी काही मोठी नावे समोर येण्याची शक्यता वर्तवण्यात येत आहे. ही महिला नेमकी कोणाच्या संपर्कात होती आणि तिने किती विद्यार्थ्यांकडून पैसे घेतले, याचा सखोल तपास आता सीबीआय करणार आहे. पेपर फुटीच्या या रॅकेटचे जाळे अनेक राज्यांत पसरले असून पुण्याचे हे कनेक्शन अत्यंत महत्त्वाचे मानले जात आहे.