सातारा: पुणे-बेंगळुरू महामार्गावरील उंब्रजच्या पुलावर चालत्या उभ्या टेंपोला अचानक भीषण आग; नागरिक व पोलिसांच्या तत्परतेने टळला मोठा अनर्थ

सातारा: पुणे-बेंगळुरू राष्ट्रीय महामार्गावरील उंब्रजच्या भराव पुलावर उभ्या असलेल्या एका टेंपोला अचानक भीषण आग लागल्याची घटना आज, शुक्रवारी (दि. १८)दुपारी बारा वाजण्याच्या सुमारास घडली. या अचानक लागलेल्या आगीमुळे महामार्गावर एकच खळबळ उडाली आणि काही काळ वाहतूक पूर्णपणे विस्कळीत झाली होती. मिळालेल्या माहितीनुसार, संबंधित टेंपो चालकाने आपला टेंपो (क्रमांक MH 04 LQ 6816) पुलावर सातारा-कराड मार्गाच्या बाजूला उभा केला होता. यादरम्यान अचानक या वाहनाने पेट घेतला. पाहता पाहता आगीने उग्र रूप धारण केले आणि टेंपोच्या केबिनसह पाठीमागील बाजूस शिसे असलेल्या ॲल्युमिनियम प्लेटवर झाकलेल्या ताडपत्रीनेही वेगाने पेट घेतला.

महामार्गावर घडलेल्या या प्रकारामुळे परिसरामध्ये भीतीचे वातावरण पसरले. टेंपोतून धुराचे लोट निघत असल्याचे लक्षात येताच उंब्रज परिसरातील जागरूक नागरिक आणि स्थानिक पोलीस तात्काळ मदतीसाठी घटनास्थळी धावून आले. अत्यंत बिकट परिस्थितीत दोघांनी दाखवलेल्या प्रसंगावधानामुळे एक मोठा अनर्थ टळला. स्थानिक नागरिकांनी आणि पोलिसांनी तात्काळ हालचाल करत जवळच असलेल्या एका बँकेतून आणि पेट्रोल पंपावरून उपलब्ध अग्निशामक यंत्रे (Fire Extinguishers) आणली आणि आग विझवण्याचा प्रयत्न सुरू केला.

परंतु आगीची तीव्रता अधिक असल्याने आग पूर्णपणे आटोक्यात येत नव्हती. त्यामुळे तातडीने स्थानिक पातळीवर पाण्याचे दोन टँकर घटनास्थळी बोलावण्यात आले. टँकरमधील पाण्याच्या पाण्याचा सतत मारा करून अखेर अथक प्रयत्नांनंतर आगीवर पूर्णपणे नियंत्रण मिळवण्यात यश आले आणि आग विझवण्यात आली. सुदैवाने या दुर्घटनेत कोणतीही जीवितहानी झाली नसल्याची माहिती समोर आली आहे. मात्र, या आगीत टेंपोचे मोठे नुकसान झाले आहे. दरम्यान, हा टेंपो अचानक कसा पेट घेतला आणि आग लागण्याचे नेमके कारण काय होते, याबाबत अद्याप कोणतीही स्पष्ट माहिती समोर आलेली नाही. पोलीस या संपूर्ण प्रकरणाचा अधिक तपास करत आहेत. आग विझवल्यानंतर महामार्गावरील वाहतूक सुरळीत करण्यात आली, ज्यामुळे वाहनचालक आणि प्रशासनाने सुटकेचा श्वास सोडला.