प्रभासच्या 'फौजी' चित्रपटाच्या सेटवर शोककळा; भीषण अपघातात क्रू मेंबरचा मृत्यू, शूटिंग तात्पुरते स्थगित!

दाक्षिणात्य सुपरस्टार प्रभासच्या आगामी 'फौजी' चित्रपटाच्या युनिटवर दुःखाचा डोंगर कोसळला आहे. हैदराबादच्या बाहेरील भागात झालेल्या एका भीषण रस्ते अपघातात चित्रपटाच्या टीममधील एका सदस्याचा दुर्दैवी मृत्यू झाला असून पाच जण जखमी झाले आहेत.

या घटनेमुळे चित्रपटाचे चित्रीकरण तात्पुरते थांबवण्यात आले आहे. मिळालेल्या माहितीनुसार, मंगळवारी पहाटे चित्रपटाची टीम चित्रीकरणासाठी रामोजी फिल्म सिटीकडे जात असताना हा अपघात झाला.

हैदराबादच्या बाहेरील अब्दुल्लापूरमेट जवळ चालकाचे नियंत्रण सुटल्याने त्यांचे वाहन सिमेंटच्या दुभाजकाला जोरात धडकले. या धडकेत एका क्रू मेंबरचा जागीच मृत्यू झाला, तर जखमींना तातडीने जवळच्या रुग्णालयात दाखल करण्यात आले आहे.
दिग्दर्शक हनु राघवपुडी आणि मैत्री मूव्ही मेकर्स यांनी या घटनेनंतर चित्रीकरण स्थगित करण्याचा निर्णय घेतला आहे.

या चित्रपटाचे सुमारे ८० टक्के काम पूर्ण झाले असून केवळ प्रभासचे तीन महत्त्वाचे अ‍ॅक्शन सीक्वेन्स चित्रित होणे बाकी आहे.
या दुर्दैवी घटनेमुळे संपूर्ण चित्रपटसृष्टी हळहळ व्यक्त करत आहे. तरीही, चित्रपट दसऱ्याच्या मुहूर्तावर, म्हणजेच ऑक्टोबर २०२६ मध्ये प्रदर्शित करण्याचे निर्मात्यांचे उद्दिष्ट आहे.