कोल्हापुरात काळाचा घाला! मामाला वाचवायला गेलेला भाचाही बुडाला; हिरण्यकेशी नदीत दोघांचा दुर्दैवी अंत

कोल्हापूर (आजरा): कोल्हापूर जिल्ह्यातील आजरा तालुक्यातून एक अत्यंत हृदयद्रावक घटना समोर आली आहे. सासऱ्यांच्या सेवानिवृत्तीच्या आनंदाचा कार्यक्रम आटोपून घरी परतत असताना, मामा आणि भाच्याचा हिरण्यकेशी नदीत बुडून दुर्दैवी मृत्यू झाला. सुनील विष्णू सुतार (वय ५५, रा. कोवाडे) आणि प्रवीण पांडुरंग सुतार (वय ३५, रा. वाळकी, कर्नाटक) अशी मृतांची नावे आहेत.

मिळालेल्या माहितीनुसार, प्रवीण सुतार यांच्या सासऱ्यांचा (अरुण सुतार) रविवारी गडहिंग्लज तालुक्यातील हिरलगे येथे सेवानिवृत्तीचा कार्यक्रम होता. हा सोहळा आटोपल्यानंतर मामा-भाचे दोघेही सोमवारी दुपारी दुचाकीवरून कोवाडे गावाकडे जाण्यास निघाले. हिरलगे आणि कोवाडे दरम्यान हिरण्यकेशी नदीवर एक अर्धवट अवस्थेतील बंधारा आहे. या ठिकाणी दुचाकी लावून ते नदीपात्रातून पलीकडे जाण्याचा प्रयत्न करत होते.

नदी ओलांडत असताना दगडांवरील शेवाळामुळे मामा सुनील सुतार यांचा पाय घसरला आणि ते खोल पाण्यात पडले. त्यांना वाचवण्यासाठी भाचा प्रवीणने तात्काळ पाण्यात उडी घेतली, मात्र पाण्याचा अंदाज न आल्याने दोघेही प्रवाहाच्या विळख्यात अडकले आणि त्यांचा बुडून मृत्यू झाला. दोन दिवस चाललेल्या शोधमोहिमेनंतर तिसऱ्या दिवशी दोघांचे मृतदेह हाती आले. या घटनेमुळे संपूर्ण सुतार कुटुंबावर दुःखाचा डोंगर कोसळला असून परिसरात हळहळ व्यक्त केली जात आहे. अर्धवट बंधाऱ्यामुळेच हा अपघात झाल्याचा आरोप करत स्थानिकांनी संताप व्यक्त केला आहे.