Pune Accident: पॉलिक्लिनिकमधून थेरपी करुन बाहेर निघाले, भरधाव कारची बाईकला धडक; भीषण अपघातात दीर-वहिनीचा करुण अंत

Pune  : येरवडा-विमानतळ रस्त्यावर भरधाव कारने समोरून येणाऱ्या दुचाकीला जोरात धडक दिल्याने दुचाकीस्वाराचा गंभीर जखमी होऊन जागीच मृत्यू झाला; तसेच दुचाकीवरील सहप्रवासी महिलेचा उपचारादरम्यान रुग्णालयात मृत्यू झाला. गुरुवारी सकाळी ९.३०च्या सुमारास ‘एअरफोर्स स्टेशन’जवळ हा अपघात झाला. अपघातातील दोन्ही मृत हे नात्याने वहिनी आणि दीर होते.

आशीर्वाद नागेश गोवेकर (वय ५२, म्हापसा, गोवा) आणि रेश्मा रमेश गोवेकर (वय ५७, रा. धानोरी) अशी मृत्यू झालेल्यांची नावे आहेत. या प्रकरणी प्रसाद गोवेकर (वय ५४) यांनी तक्रार दिली आहे. त्यावरून कारचालक अचलकुमार नरेंद्र प्रसाद (वय ४३, रा. शुभ गेटवे, विमाननगर) याच्यावर भरधाव वाहन चालवून मृत्यूस कारणीभूत ठरल्याचा गुन्हा दाखल करण्यात आला आहे. दोघांच्या मृत्यूनंतर गोवेकर कुटुंबावर दुःखाचा डोंगर कोसळला.

Leopard Attack : वडिलांच्या डोळ्यादेखत बिबट्याने मुलीला ओढत नेले; लिंबाच्या बागेत काम करतानाची घटना

हवाई दलाच्या रुग्णवाहिकेतून जखमी रेश्मा गोवेकर यांना तातडीने कमांड हॉस्पिटलमध्ये नेण्यात आले. त्यांच्यावर उपचार सुरू असताना दुपारी त्यांचा मृत्यू झाला. दरम्यान, अपघातानंतर कारचालकाने येरवडा पोलिस ठाण्यात हजर होऊन घटनेची माहिती दिली. रेश्मा गोवेकर यांच्या पश्चात दोन विवाहित मुली आहेत. आशीर्वाद हे गोव्यात सराफी दुकानात काम करीत होते, अशी माहिती नातेवाईकांनी दिली.

नववर्ष स्वागतासाठी आले होते पुण्यात

रेश्मा यांचे दीर आशीर्वाद गोवेकर मूळचे गोव्यातील रहिवासी. कुटुंबीयांसोबत नववर्षाचे स्वागत करता यावे, यासाठी ते चार दिवसांपूर्वीच गोव्यातून पुण्यात आले होते. त्यादरम्यान वहिनीला दवाखान्यात घेऊन जाताना झालेल्या अपघातात त्यांना प्राण गमवावा लागला.