जपानमध्ये महिलाराज! सानाए ताकाइची यांना बहुमत, पीएम मोदींकडून अभिनंदन

जपानच्या राजकीय वर्तुळातून या क्षणाची सर्वात मोठी बातमी समोर आली आहे. जपानमधील संसंदीय निवडणुकीत पंतप्रधान सानाए ताकाइची यांच्या लिबरल डेमोक्रेटिक या पक्षाने आपला ठसा उमटवत ऐतिहासिक कामगिरी केली आहे. लिबरल डेमोक्रेटिक पार्टीने ऐतिहासिक असा विजय मिळवला आहे. नेतृत्व आणि भ्रष्टाचारांच्या आरोपांमुळे पक्षाचा पराभव होईल, अशी निवडणुकीदरम्यान चर्चा पाहायला मिळत होती. त्यामुळे या निवडणुकीच्या निकालाकडे साऱ्या जगाचं लक्ष लागून होतं. त्यामुळे सानाए ताकाइची यांच्यासाठी ही निवडणूक प्रतिष्ठेची झाली होती. मात्र भ्रष्टाचार आणि इतर सर्व मुद्द्यांचा या निवडणुकीवर काहीही परिणाम झाला नाही. सानाए ताकाइची यांच्या नेतृत्वात पक्षाने बहुमताचा आकडा गाठला. यासह पक्षाने दणदणीत कामगिरी करुन बाजी मारली.

पंतप्रधान नरेंद्र मोदींकडून अभिनंदन, पोस्टमध्ये काय म्हटलंय?

सानाए ताकाइची यांच्या पक्षाच्या ऐतिहासिक विजयानंतर भारताचे पंतप्रधान नरेंद्र मोदी यांनी त्यांचं अभिनंदन केलंय. मोदींनी एक्स या सोशल मीडिया प्लॅटफॉर्मवर पोस्ट करत सानाए ताकाइची यांना शुभेच्छा दिल्या आहेत. “सानाए ताकाइची यांचं निवडणुकीतील ऐतिहासिक विजयाबद्दल अभिनंदन. आपली विशेष रणनिती आणि जागतिक भागीदारी जागतिक शांतता, स्थिरता आणि समृद्धी वाढविण्यात महत्त्वपूर्ण भूमिका बजावते”, असा उल्लेख करत मोदींनी सानाए ताकाइची यांचं कौतुक केलंय.

तसेच मोदींनी भारत-जपानच्या मैत्रीचाही या पोस्टमध्ये उल्लेख केलाय. “तुमच्या सक्षम नेतृत्वात भारत-जपान मैत्रीला आणखी उंचीवर नेणं सुरू ठेवू याची मला खात्री आहे”,असा विश्वास मोदींनी या पोस्टद्वारे व्यक्त केला.

पंतप्रधान नरेंद्र मोदींची एक्स पोस्ट

Congratulations Sanae Takaichi on your landmark victory in the elections to the House of Representatives!

Our Special Strategic and Global Partnership plays a vital role in enhancing…

— Narendra Modi (@narendramodi) February 8, 2026

आकड्यांचं गणित

कनिष्ठ सभागृहाची सभासदसंख्या ही एकूण 465 इतकी आहे. तर 233 ही मॅजिक फिगर आहे. लिबरल डेमोक्रेटिक पार्टीने हा बहुमताचा आकडा गाठला. विशेष आणि उल्लेखनीय बाब अशी की मतदान संपल्यानंतर फक्त नि फक्त 2 तासांतच हा आकडा गाठला. लिबरल डेमोक्रेटिक पार्टीचा हा आतापर्यंतचा ऐतिहासिक विजय असल्याची चर्चा राजकीय वर्तुळात पाहायला मिळत आहे.

बहुमत गमावलं-युती तुटली, तरीही मिळवला विजय

सानाए ताकाइची यांनी गेल्या ऑक्टोबरमध्ये आपल्या पक्षाच्या नेतृत्वाच्या निवडणुकीत बाजी मारली होती. या विजयामुळे त्यांचा विश्वास दुणावला होता. त्यानंतर सानाए ताकाइची यांनी तब्बल 36 वर्षांनंतर निवडणुकीची घोषणा केली. जनमताचा कौल मिळवणं हा या निवडणूक घेण्यामागील प्रमुख हेतू होता.

सानाए ताकाइची यांचा निवडणूक जाहीर करण्याचा हा निर्णय मोठा राजकीय डाव असल्याची चर्चा होती, त्याचं कारण म्हणजे एलडीपीने दोन्ही सभागृहात आवश्यक बहुमत गमावलं होतं. तसेच कोमेतो पक्षासोबतची गेल्या अनेक वर्षांपासून असलेली युतीही तुटली होती. मात्र या अशा अनेक अडचणी आणि संकटांवर मात करत सानाए ताकाइची यांनी न डगमगता आपल्या नेतृत्वात एकतर्फी विजय मिळवला.