Pune Crime : CBI अधिकारी असल्याचे भासवून ज्येष्ठाची १०.७५ कोटींची फसवणूक; एटीएमला गेले आणि जाळ्यात अडकले

Pune : ‘डिजिटल अरेस्ट’ची भीती दाखवून शहरातील एका ज्येष्ठ नागरिकाची पावणेअकरा कोटी रुपयांची फसवणूक करणाऱ्या सायबर चोरट्यांना सायबर गुन्हे शाखेने अटक केली आहे. हर्षद सुभाष धनतोले (वय 23) आणि समर्थ सुरेश देशमुख (वय 24, दोघे सध्या रा. कर्वेनगर, मूळ रा. छत्रपती संभाजीनगर) अशी अटक केलेल्या आरोपींची नावे आहेत.

अधिकारी असल्याचं सांगितलं
पोलिसांनी दिलेल्या माहितीनुसार, आरोपी धनतोले आणि देशमुख यांनी ज्येष्ठ नागरिकाच्या मोबाइलवर संपर्क साधून स्वतःला केंद्रीय गुन्हे अन्वेषण विभागाचे (सीबीआय) अधिकारी असल्याचे भासवले. काळ्या पैशांच्या व्यवहारात संबंधित ज्येष्ठ नागरिकाच्या बँक खात्याचा वापर झाल्याचा आरोप करून त्यांना ‘डिजिटल अरेस्ट’ करण्यात येणार असल्याची भीती दाखवली; तसेच या प्रकरणात कुटुंबीयांनाही अटक होऊ शकते, असे सांगून दिलेल्या बँक खात्यात तातडीने रक्कम जमा करण्यास भाग पाडले. भीतीपोटी ज्येष्ठ नागरिकाने आरोपींनी सांगितलेल्या खात्यात दहा कोटी 74 हजार रुपये जमा केले. काही दिवसांनी फसवणूक झाल्याचे लक्षात आल्यानंतर त्यांनी शिवाजीनगर येथील सायबर पोलिस ठाण्यात तक्रार दाखल केली.

ATM मधून रक्कम काढल्याचं समोर
तक्रार प्राप्त होताच सायबर पोलिसांनी तांत्रिक तपास सुरू केला. संबंधित बँक खात्याची छाननी करण्यात आली; तसेच आरोपींनी शहरातील काही एटीएममधून रक्कम काढल्याचे उघड झाले. एटीएममधील सीसीटीव्ही चित्रीकरणाच्या आधारे पोलिसांनी आरोपींची ओळख पटवून त्यांना अटक केली. पोलिस उपायुक्त विवेक मासाळ यांच्या मार्गदर्शनाखाली सायबर पोलिस ठाण्याच्या वरिष्ठ निरीक्षक स्वप्नाली शिंदे, निरीक्षक संगीता देवकाते, सहायक निरीक्षक अर्चना कटके, उपनिरीक्षक सुशील डमरे, अजित बढे, कृष्णकांत देसाई, रवींद्र साळवी, जान्हवी भडेकर, गंगाधर काळे, नवनाथ कोंडे यांच्या पथकाने ही कारवाई केली.

सायबर चोरटे एखाद्या व्यक्तीची फसवणूक केल्यानंतर संबंधित रक्कम वेगवेगळ्या बँक खात्यात ट्रान्सफर करतात. बऱ्याच व्यवहारांनंतर प्रत्यक्षात ती रक्कम ताब्यात घेतली जाते. मात्र, या घटनेतील सायबर चोरट्यांनी एटीएममधून पैसे काढल्याने ते पोलिसांच्या डोळ्यावर आले. त्यांनी एटीएममधून रोकड काढली नसती, तर त्यांचा शोध लावणे अवघड बनले असते.

ठळक मुद्दे
अटक आरोपींकडून चाल लाख 78 हजार रुपयांची रोकड जप्त
त्यांच्या बँक खात्यातील सुमारे 40 लाख रुपयांची रक्कम गोठवली
उर्वरित रकमेचा शोध सुरु