पुणे: १ सप्टेंबरला ओबीसींचे शक्तिप्रदर्शन! लक्ष्मण हाकेंची ‘चलो मुंबई’ची हाक; सरकारला दिला थेट इशारा

पुणे: राज्य सरकारच्या आरक्षणासंदर्भातील धोरणांविरोधात आणि ओबीसींच्या आरक्षणाच्या संरक्षणासाठी १ सप्टेंबर रोजी 'चलो मुंबई' आंदोलनाची हाक ओबीसी हक्क आंदोलक लक्ष्मण हाके यांनी दिली आहे. राज्यातील ओबीसी समाजाने मोठ्या संख्येने मुंबईत सहभागी व्हावे, असे आवाहन त्यांनी मंगळवारी (१८) इंदापूर येथील शासकीय विश्रामगृहात झालेल्या पत्रकार परिषदेत केले.

हाके यांनी राज्य सरकार, महायुतीचे नेते तसेच मराठा आरक्षण आंदोलनाचे नेते मनोज जरांगे यांच्यावर टीका केली. आरक्षणाच्या प्रश्नावर सरकारने आपली भूमिका स्पष्ट करावी, अशी मागणी त्यांनी केली. जात पडताळणी समित्यांवर दबाव आणणे किंवा त्यांच्या कामकाजावर राजकीय पद्धतीने टीका करणे योग्य नसल्याचेही त्यांनी म्हटले.

 

 

मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांनी आरक्षणासंदर्भातील अध्यादेश आणि सरकारच्या भूमिकेबाबत अधिकृत स्पष्टीकरण द्यावे, अशी मागणी हाके यांनी केली. 'सगेसोयरे' किंवा अन्य कोणत्याही मार्गाने ओबीसींच्या आरक्षणाच्या हक्कांवर परिणाम करण्याचा प्रयत्न झाल्यास त्याला विरोध केला जाईल, असा इशाराही त्यांनी दिला.

स्वतंत्र ओबीसी जनगणनेची मागणी
आगामी जनगणनेत ओबीसींची स्वतंत्र आणि अधिकृत नोंद व्हावी, अशी मागणी हाके यांनी केली. ओबीसींची लोकसंख्या आणि सामाजिक स्थितीची अचूक आकडेवारी उपलब्ध होणे आवश्यक असल्याचे त्यांनी सांगितले.

'ओबीसींच्या आरक्षणाला धक्का नको'
ज्यांना आरक्षण द्यायचे आहे, त्यांना सरकारने आरक्षण द्यावे; मात्र त्यासाठी ओबीसींच्या विद्यमान आरक्षणावर परिणाम होता कामा नये, अशी भूमिका हाके यांनी मांडली. ओबीसींच्या आरक्षणाच्या हक्कांवर गदा आणण्याचा प्रयत्न झाल्यास समाज व्यापक आंदोलन उभारेल, असा इशाराही त्यांनी दिला. पत्रकार परिषदेला पोपटराव पवार, तानाजी धोत्रे यांच्यासह कार्यकर्ते उपस्थित होते.