इलॉन मस्क: भारतातील ११,२५६ गावांना स्टारलिंक जोडणार! इंटरनेट नसलेल्या दुर्गम भागांसाठी मोठी घोषणा!

इलॉन मस्क: जगातील सर्वात श्रीमंत उद्योगपती आणि स्पेसएक्सचे प्रमुख इलॉन मस्क (Elon Musk) यांनी भारतातील ग्रामीण आणि अतिदुर्गम भागांसाठी एक महत्त्वाची घोषणा केली आहे. भारतातील ग्रामीण भागात हाय-स्पीड इंटरनेट पोहोचवण्यासाठी त्यांची सॅटेलाइट ब्रॉडबँड कंपनी 'स्टारलिंक' (Starlink) पूर्णपणे सज्ज असल्याचे त्यांनी म्हटले आहे.

नेमकी पार्श्वभूमी काय आहे?
देशातील तब्बल ११,२५६ गावांमध्ये अजूनही कोणतेही ४जी (4G) किंवा ५जी (5G) मोबाईल नेटवर्क पोहोचलेले नाही, असा दावा एका अलीकडील रिपोर्टमधून करण्यात आला होता. या रिपोर्टनुसार, मार्च २०२६ पर्यंत भारतात १.०९ अब्ज इंटरनेट सबस्क्रिप्शन होते, त्यापैकी केवळ ४४ कोटी ४० लाख सबस्क्रिप्शन ग्रामीण भागातील होती. ग्रामीण भागात प्रति १०० लोकांमागे इंटरनेट घनता केवळ ४८.३१ इतकी आहे, जी शहरी भागाच्या तुलनेत खूपच कमी आहे. दुर्गम भाग, डोंगराळ प्रदेश आणि बेटांवर ऑप्टिकल फायबर केबल टाकणे किंवा मोबाईल टाॅवर उभारणे कठीण व खर्चिक ठरते.

 

 

इलॉन मस्क यांची 'एक्स'वरील प्रतिक्रिया:
या डिजिटल दरीवर आणि इंटरनेट नसलेल्या ११,२५६ गावांच्या आकडेवारीवर प्रतिक्रिया देताना इलॉन मस्क यांनी सोशल मीडिया प्लॅटफॉर्म 'एक्स' (पूर्वीचे ट्विटर) वर पोस्ट केली. मस्क यांनी लिहिले की, "भारतातील सर्वात शेवटच्या घटकांपर्यंत, विशेषतः ग्रामीण भागातील दुर्गम लोकांपर्यंत इंटरनेट पोहोचवण्यासाठी स्टारलिंक मोठी मदत करेल."

पारंपरिक दूरसंचार कंपन्यांचे जाळे जिथे पोहोचू शकत नाही, अशा अत्यंत दुर्गम आणि डोंगराळ भागांमध्ये स्टारलिंकचे उपग्रह इंटरनेट (Satellite Internet) वरदान ठरू शकते. लो-अर्थ ऑर्बिट (LEO) मधील सॅटेलाइट नेटवर्कद्वारे थेट जोडणी मिळवून देण्याची ही तंत्रज्ञान प्रणाली दुर्गम भागातील नागरिकांसाठी डिजिटल क्रांती घडवून आणू शकते. सध्या स्टारलिंक भारतात व्यावसायिक सेवा सुरू करण्यासाठी आवश्यक असणाऱ्या नियामक मंजुरी आणि स्पेक्ट्रम वाटपाच्या प्रतीक्षेत आहे.