सातारा: आजीच्या मागे धावणाऱ्या चिमुकड्यावर काळाचा घाला; सातारा तालुक्यातील अजोली-लिंब येथे उघड्या नाल्यात पडून बालकाचा मृत्यू

सातारा : आईसोबत आजोळी आलेल्या साडेतीन वर्षीय चिमुकल्याचा आजीमागे धावताना शोषखड्ड्यात पडून बुडाल्याने मृत्यू झाला. ही दुर्दैवी घटना गुरुवारी (दि. ३०) दुपारी दोनच्या सुमारास लिंब आवळीमाथा (ता. सातारा) येथे घडली. हर्ष स्वप्निल लोंढे (रा. बेलवडे, ता. सातारा) असे मृत चिमुकल्याचे नाव आहे.सातारा तालुका पोलिसांनी दिलेल्या माहितीनुसार, हर्षचे वडील सैन्यदलात कार्यरत आहेत. सध्या त्यांचे पोस्टिंग पुणे येथे आहे. हर्ष आईसोबत आजोळी लिंब येथे आला होता. गुरुवारी दुपारी शेतात निघालेल्या आजीच्या मागे तो निघाला होता. आजी काही अंतरावर पुढे गेल्याने धावताना तो रस्त्याकडेच्या शोषखड्ड्यात पडला.

हा प्रकार लक्षात येताच आजीने आरडाओरडा केला. परिसरातील दोन तरुणांनी सुमारे १० फूट खोल शोषखड्ड्यात उडी घेऊन हर्षचा शोध घेतला. मात्र, यात यश आले नाही.त्यानंतर हर्षचे चुलत आजोबा पांडुरंग रामचंद्र सावंत (वय ५३, रा. लिंब) यांनी शोषखड्ड्यातून हर्षला बाहेर काढले. बेशुद्धावस्थेत त्याला तातडीने जिल्हा शासकीय रुग्णालयात दाखल केले. मात्र, उपचारापूर्वीच त्याचा मृत्यू झाल्याचे डॉक्टरांनी स्पष्ट केले. याबाबत पांडुरंग सावंत यांनी सातारा तालुका पोलिस ठाण्यात वर्दी दिली.

कुटुंबीयांना धक्का
चिमुकल्या हर्षचा दुर्दैवी मृत्यू झाल्याचे समजताच त्याच्या कुटुंबीयांना धक्का बसला. त्याच्या आईची १५ दिवसांपूर्वीच प्रसूती झाली आहे. हर्षच्या दुर्दैवी मृत्यूने लिंब आणि बेलवडे या दोन्ही गावांवर शोककळा पसरली.

शोषखड्ड्यांचा धोका
या घटनेने गावागावातील उघड्या शोषखड्ड्यांचा धोका स्पष्ट झाला. लहान मुले पडून होणाऱ्या दुर्घटना टाळण्यासाठी शोषखड्डे बंदिस्त करावेत किंवा त्याभोवती संरक्षक कठडे तयार करण्याची गरज निर्माण झाली आहे.