पुणे: मोशी दुर्घटनेने उद्ध्वस्त झाले कुटुंब, कचऱ्याच्या ढिगाऱ्याखाली पतीचा मृत्यू, काही आठवड्यांतच पत्नीनेही संपवले जीवन; २ चिमुकल्या मुली पूर्णपणे पोरक्या!

पुणे: मोशी कचरा डेपो दुर्घटनेत पती नागेश गायकवाड यांचा मृत्यू झाल्यानंतर अवघ्या काही आठवड्यांत त्यांच्या पत्नी सोनाली नागेश गायकवाड (वय २३) यांचा बुधवारी सायंकाळी राहत्या घरी मृत्यू झाल्याची धक्कादायक घटना समोर आली. या घटनेमुळे गायकवाड कुटुंबावर कोसळलेल्या दुःखात आणखी भर पडली आहे. मिळालेल्या माहितीनुसार, बुधवारी सायंकाळी सुमारे सातच्या सुमारास ही घटना घडली. घटनेची माहिती मिळताच एमआयडीसी भोसरी पोलिसांनी घटनास्थळी धाव घेतली. पोलिसांनी अकस्मात मृत्यूची नोंद केली असून, या घटनेमागील नेमकी पार्श्वभूमी आणि कारणांचा तपास सुरू केला आहे.

मोशी कचरा डेपो दुर्घटनेत १२ जुलै रोजी नागेश गायकवाड यांचा मृत्यू झाला होता. पतीच्या निधनाचा मोठा धक्का बसलेल्या सोनाली यांचाही काही आठवड्यांतच मृत्यू झाल्याने कुटुंबीयांसह परिसरात हळहळ व्यक्त होत आहे. पतीच्या निधनानंतर आलेला मानसिक आघात आणि दुःख हे या घटनेमागील संभाव्य कारण असावे, असा पोलिसांचा प्राथमिक अंदाज असल्याचे सांगण्यात येत आहे. मात्र, सोनाली यांच्या मृत्यूचे नेमके कारण अद्याप अधिकृतपणे स्पष्ट झालेले नाही.

एमआयडीसी भोसरी पोलीस या प्रकरणाचा पुढील तपास करत असून, तपासातून घटनेमागील परिस्थितीबाबत अधिक माहिती समोर येण्याची शक्यता आहे. मोशी कचरा डेपो दुर्घटनेने आधीच गायकवाड कुटुंबातील एका कर्त्या व्यक्तीचा जीव घेतला होता. त्यानंतर अल्पावधीतच सोनाली यांच्या मृत्यूने या कुटुंबावर आलेल्या संकटाची तीव्रता आणखी वाढली आहे.