नागपुर: ८० वर्षीय आजीचे थरारक रेस्क्यू, मुलांना कपाटावर बसवून आईचा संघर्ष; मुसळधार पावसामुळे अनेक संसार उद्ध्वस्त

नागपूर: स्वरूप नगर परिसरात राहणाऱ्या हितेश मेहता यांच्या घरात दुपारी तीनच्या सुमारास अचानक पाणी शिरण्यास सुरुवात झाली. काही वेळातच घरात कमरेपर्यंत पाणी साचल्याने ८० वर्षीय कुंता मेहता, त्यांची सून आणि लहान नात घरात अडकून पडले. परिसरात मोठ्या प्रमाणात पाणी साचल्यामुळे कुटुंबातील पुरुष सदस्य वेळत घटनास्थळी पोहोचू शकले नाहीत. अखेर नातेवाईकांनी एनडीआरएफ (NDRF) आणि अग्निशमन विभागाशी संपर्क साधल्यानंतर सायंकाळी पाचच्या सुमारास बचावकार्य सुरू करण्यात आले.

एनडीआरएफ आणि अग्निशमन विभागाच्या जवानांनी कुंता मेहता यांना खुर्चीवर बसवून अत्यंत सुरक्षितपणे घराबाहेर काढले. या थरारक बचावकार्याचा व्हिडिओ सोशल मीडियावर मोठ्या प्रमाणात व्हायरल झाला आहे. या पुरामुळे घरातील धान्य, कपडे, पुस्तके, फ्रीज आणि इतर महत्त्वाचे गृहपयोगी साहित्य पूर्णपणे खराब झाल्याने मेहता कुटुंबाचे लाखो रुपयांचे नुकसान झाले आहे.

मुलाचा जीव वाचवण्यासाठी आईचा संघर्ष
शहरातील इतर भागांमध्येही पुराच्या पाण्याने थैमान घातले होते. शितल शेंडे या आपल्या लहान मुलांसोबत घरी एकट्याच असताना त्यांच्या घरात अचानक पाणी शिरले. पाण्याची पातळी झपाट्याने वाढून पाणी कमरेपर्यंत पोहोचल्यामुळे परिस्थिती अत्यंत गंभीर बनली. आपल्या लहान मुलाचा जीव वाचवण्यासाठी या माऊलीने प्रसंगावधान राखत त्याला थेट कपाटावर बसवले. मदतीची प्रतीक्षा करत त्या अनेक तास पाण्यात अडकून राहिल्या. पुराच्या पाण्यामुळे घरातील खाद्यान्न, कपडे आणि जीवनावश्यक वस्तू नष्ट झाल्यामुळे या कुटुंबावर उपाशी झोपण्याची वेळ आली. या कठीण प्रसंगात लोकप्रतिनिधींकडून कोणतीही अपेक्षेप्रमाणे मदत मिळाली नसल्याची खंत त्यांनी व्यक्त केली आहे.

प्रशासनाचे मदतकार्य आणि नागरिकांसमोर मोठे आव्हान
सध्या नागपूरमधील अनेक भागांतून पुराचे पाणी ओसरले असले, तरी उद्ध्वस्त झालेला संसार पुन्हा उभा कसा करायचा, हा प्रश्न नागरिकांना सतावत आहे. प्रशासनाकडून बाधित भागांमध्ये नुकसानाचे पंचनामे करण्याचे काम सुरू असून नागरिकांना योग्य ती मदत व पुनर्वसन लवकरात लवकर उपलब्ध करून देण्याची मागणी जोर धरत आहे.