मुंबई: फोनवर बोलण्यासाठी गेला आणि थेट खाली कोसळला; कांजूरमार्गमध्ये मजुराचा मृत्यू, पोलिसांकडून गुन्हा दाखल

मुंबई: कांजूरमार्ग परिसरात एक अत्यंत दुर्दैवी घटना समोर आली आहे. मोबाईलवर फोनवर बोलण्यासाठी गेलेला एक कामगार अचानक खाली कोसळल्याने त्याचा जागीच मृत्यू झाल्याची घटना घडली आहे. या प्रकरणी कांजूरमार्ग पोलिसांनी संबंधित घटनेची नोंद करून पुढील कायदेशीर तपास सुरू केला आहे.

नेमकी घटना काय?
कांजूरमार्ग पोलिसांनी दिलेल्या माहितीनुसार, १० जुलै रोजी सकाळी १० वाजण्याच्या सुमारास रुणवाल सिटी सेंटर परिसरामध्ये एक व्यक्ती बेशुद्धावस्थेत खाली पडल्याची माहिती पोलिसांच्या नियंत्रण कक्षाला मिळाली होती. या माहितीनुसार पोलीस तात्काळ घटनास्थळी दाखल झाले. पोलिसांनी त्या व्यक्तीला तातडीने उपचारासाठी नजीकच्या रुग्णालयात दाखल केले, मात्र तेथील डॉक्टरांनी तपासणी केल्यानंतर त्या कामगाराला मृत घोषित केले.

पोलिसांकडून गुन्हा दाखल
प्राथमिक तपासात ही दुर्घटना कशी घडली याचा शोध घेतला जात असून, हा अपघात आहे की यामध्ये इतर काही कारणे आहेत, या दृष्टीने पोलीस कसून चौकशी करत आहेत. याप्रकरणी संबंधित सुरक्षा व्यवस्थेतील आणि कामाच्या ठिकाणच्या दिरंगाईबाबत कांजूरमार्ग पोलीस ठाण्यात गुन्हा दाखल करण्यात आला असून, पोलीस अधिक तपास करत आहेत.