पुणे: बायकोला 'जेवायला बसलोय' मेसेज केला अन् क्षणात होत्याचे नव्हते झाले; भावेश वाणींचा दुर्देवी अंत!

पुणे: पिंपरी-चिंचवडमधील मोशी कचरा डेपो येथे बुधवारी दुपारी घडलेल्या दुर्घटनेत एका कामगाराचा दुर्दैवी मृत्यू झाला आहे. कचऱ्याचा डोंगर कोसळून झालेल्या इमारतीच्या ढिगाऱ्याखाली अडकलेल्या भावेश वाणी यांचा मृतदेह शोध पथकाला शोधण्यात यश आले आहे. या घटनेमुळे संपूर्ण परिसरात हळहळ व्यक्त केली जात आहे.

घटनेचा तपशील:
मोशी कचरा डेपोतील 'वेस्ट टू एनर्जी' प्रकल्पाच्या तीन मजली प्रशासकीय इमारतीवर बुधवारी दुपारी अचानक हजारो टन कचऱ्याचा डोंगर कोसळला. या दुर्घटनेत संपूर्ण इमारत कोसळून १८ कामगार ढिगाऱ्याखाली अडकले होते. घटनेची माहिती मिळताच अग्निशमन दल, एनडीआरएफ (NDRF) आणि लष्कराच्या जवानांनी बचावकार्य सुरू केले. पाच कामगारांनी उड्या मारून जीव वाचवला, तर आतापर्यंत काही कामगारांना सुखरूप बाहेर काढण्यात यश आले आहे.

 

भावेश वाणी यांची हृदयद्रावक कहाणी:
मृतक भावेश वाणी हे मूळचे जळगावचे रहिवासी असून, कुटुंबाचा एकमेव आधार होते. बुधवारी दुपारी जेवणाच्या सुटीत त्यांनी आपल्या पत्नीला 'मी जेवायला बसलो आहे,' असा मेसेज पाठवला होता. मात्र, काही मिनिटांतच त्यांच्यावर काळाने घाला घातला. ढिगाऱ्याखाली आणि सिमेंटच्या खांबाखाली दबल्यामुळे त्यांचा जागीच मृत्यू झाला. दीड वर्षांपूर्वीच त्यांचा विवाह झाला होता आणि त्यांच्या मागे पत्नी, आई-वडील असा परिवार आहे.

बचावकार्याची स्थिती:
अद्यापही काही कामगार ढिगाऱ्याखाली अडकले असल्याची भीती व्यक्त केली जात आहे. बचाव पथक युद्धपातळीवर ढिगारा उपसण्याचे काम करत आहेत. जखमी कामगारांना वायसीएम रुग्णालयात उपचारासाठी दाखल करण्यात आले आहे.