उत्तर प्रदेश: फिरोजाबाद येथे मोहन भागवत प्रवास करत असलेल्या शताब्दी एक्सप्रेसवर दगडफेक; खिडकीची काच फुटली, सुरक्षा यंत्रणा अलर्ट!

उत्तर प्रदेश: गुरुवारी संध्याकाळी कानपूरहून नवी दिल्लीच्या दिशेने प्रवास करणाऱ्या 'स्वर्ण शताब्दी एक्सप्रेस'वर फिरोजाबाद आणि मक्खनपूर स्थानकांदरम्यान अज्ञातांकडून जोरदार दगडफेक करण्यात आली. या ट्रेनच्या 'एक्झिक्युटिव्ह क्लास' (E-1) कोचमध्ये राष्ट्रीय स्वयंसेवक संघाचे सरसंघचालक मोहन भागवत प्रवास करत होते.

नेमके काय घडले?
ट्रेन फिरोजाबाद परिसरातून जात असताना, अचानक बाहेरून आलेल्या एका दगडाने सरसंघचालक ज्या बोगीमध्ये बसले होते, त्या बोगीच्या खिडकीची काच फुटली. सुदैवाने, मोहन भागवत हे खिडकीपासून लांब बसलेले असल्याने त्यांना कोणतीही इजा झाली नाही आणि ते पूर्णपणे सुरक्षित आहेत. या घटनेनंतर रेल्वे प्रशासन आणि पोलीस यंत्रणेत एकच खळबळ उडाली.

 

पोलीस आणि रेल्वे प्रशासनाची कारवाई:
घटनेची माहिती मिळताच टूंडला जंक्शनवर रेल्वे सुरक्षा दल (RPF), सरकारी रेल्वे पोलीस (GRP) आणि स्थानिक पोलीस प्रशासन तातडीने सतर्क झाले. पोलिसांनी घटनास्थळाची पाहणी केली असून फिरोजाबादचे वरिष्ठ पोलीस अधीक्षक आदित्य लांघे यांनी दिलेल्या माहितीनुसार, एका संशयित व्यक्तीला ताब्यात घेण्यात आले आहे. परिसरातील सीसीटीव्ही फुटेज तपासले जात असून, दगडफेक करणाऱ्यांचा शोध घेण्यासाठी विशेष पथके तैनात करण्यात आली आहेत. रेल्वे प्रवाशांच्या सुरक्षेसाठी या भागात अधिक कडक देखरेख ठेवण्याचे निर्देश प्रशासनाने दिले आहेत.