Pune : सात नव्या ‘हायस्पीड’ रेल्वेंना ग्रीन सिग्नल, उच्चस्तरीय बैठकीत मोठा निर्णय; मुंबई–पुणे प्रवास आणखी जलद होणार

Pune : देशातील नव्या सात हायस्पीड (उच्चगती) रेल्वे प्रकल्पांच्या तातडीच्या अंमलबजावणीसाठी रेल्वे बोर्डाने महत्त्वपूर्ण मार्गदर्शक सूचना सोमवारी जारी केल्या आहेत. केंद्रीय अर्थसंकल्पात जाहीर करण्यात आलेल्या सात नव्या हायस्पीड कॉरिडॉरच्या वेळेत पूर्ततेसाठी रेल्वे बोर्डस्तरावर उच्चस्तरीय बैठक घेण्यात आली असून, त्यानंतर अनेक महत्त्वाचे निर्णय घेण्यात आले.

केंद्रीय अर्थसंकल्पात सात उच्चगती रेल्वे कॉरिडॉरमध्ये मुंबई-पुणे, पुणे-हैदराबाद, हैदराबाद-बेंगळुरू, हैदराबाद-चेन्नई, चेन्नई-बेंगळुरू, दिल्ली-वाराणसी आणि वाराणसी-सिलीगुडी यांचा समावेश आहे. या सर्व प्रकल्पांची जबाबदारी ‘नॅशनल हायस्पीड रेल कॉर्पोरेशन लिमिटेड’ कडे (एनएचएसआरसीएल) सोपविण्यात आली आहे. रेल्वे बोर्डाने यापूर्वी तयार करण्यात आलेल्या सविस्तर प्रकल्प अहवालांमध्ये (डीपीआर) सध्याच्या खर्चानुसार आवश्यक सुधारणा करण्याचे निर्देश दिले आहेत. त्यामुळे प्रकल्पाचा अचूक आर्थिक अंदाज लावता येईल. तसेच, देशभरातील उच्चगती रेल्वेसाठी एकसमान तांत्रिक व परिचालन मानके निश्चित करण्याचे कामही ‘एनएचएसआरसीएल’कडे सोपविण्यात आले आहे.

प्रत्येक प्रकल्पासाठी क्षेत्रनिहाय टीम स्थापन करणे, प्रकल्पनिहाय मुख्यालय निश्चित करणे, पूर्वबांधकाम प्रक्रिया पूर्ण करणे आणि करार प्रक्रियेची तयारी सुरू करण्यावर भर देण्यात आला आहे. या संपूर्ण कार्ययोजनेच्या प्रगतीचा नियमित आढावा घेतला जाणार आहे. यासोबतच तांत्रिक मनुष्यबळाची उपलब्धता सुनिश्चित करण्याचे निर्देश देण्यात आले आहेत.