खळबळ! डोळ्यांच्या शस्त्रक्रियेदरम्यान ६ वर्षीय चिमुकलीचा मृत्यू; दीनानाथ मंगेशकर रुग्णालयाला PMC ची नोटीस! ऑपरेशन थिएटरमध्ये प्रियांशीसोबत काय घडलं?

पुणे: पुण्यातील नामांकित दीनानाथ मंगेशकर रुग्णालयात (Deenanath Mangeshkar Hospital) एक अत्यंत धक्कादायक आणि दुर्दैवी घटना समोर आली आहे. येथे एका अवघ्या ६ वर्षांच्या चिमुरडीचा डोळ्यांच्या शस्त्रक्रियेदरम्यान संशयास्पद मृत्यू झाला आहे.
प्रियांशी जितेंद्र बागडे (रा. सुपे, अहिल्यानगर) असे मृत्यू झालेल्या चिमुकलीचे नाव आहे. डॉक्टरांच्या हलगर्जीपणामुळेच मुलीचा जीव गेल्याचा गंभीर आरोप तिच्या कुटुंबीयांनी केला आहे. या प्रकरणाची तीव्र दखल घेत पुणे महानगरपालिकेच्या (PMC) आरोग्य विभागाने मंगेशकर रुग्णालय प्रशासनाला तात्काळ 'कारणे दाखवा' नोटीस बजावली आहे. नेमके काय घडले?प्रियांशीला जन्मापासूनच मोतीबिंदू आणि तिरळेपणाचा त्रास होता. तिच्यावर यापूर्वी वयाच्या पहिल्या वर्षी एक शस्त्रक्रिया झाली होती. पुढील उपचारासाठी तिला १८ मे रोजी दीनानाथ मंगेशकर रुग्णालयात दाखल करण्यात आले होते.

शस्त्रक्रियेपूर्वी करण्यात आलेले तिचे सर्व वैद्यकीय अहवाल (Medical Reports) सामान्य आले होते आणि तिला तज्ज्ञांनी 'फिट' घोषित केले होते. कुटुंबीयांनी दिलेल्या माहितीनुसार, १८ मे रोजी सकाळी ८ वाजता प्रियांशीला हसत-खेळत ऑपरेशन थिएटरमध्ये (OT) नेण्यात आले. मात्र, शस्त्रक्रिया सुरू झाल्यानंतर अवघ्या अर्ध्या तासातच डॉक्टरांनी तिच्या वडिलांना आत बोलावले. प्रियांशीच्या तोंडातून अचानक रक्त आले असून तिचे हृदय बंद पडल्याचे (Cardiac Arrest) डॉक्टरांनी सांगितले. तिला वाचवण्याचे शर्थीचे प्रयत्न करण्यात आले, परंतु दुपारी ११:३० च्या सुमारास तिला मृत घोषित करण्यात आले.

एका साध्या डोळ्याच्या शस्त्रक्रियेदरम्यान अंतर्गत रक्तस्त्राव आणि हृदयविकाराचा झटका कसा येऊ शकतो, असा संतप्त सवाल तिच्या पालकांनी उपस्थित केला आहे. महापालिकेची नोटीस आणि २४ तासांचा अल्टिमेटमया धक्कादायक घटनेनंतर प्रियांशीच्या नातेवाईकांनी रुग्णालयाबाहेर तीव्र संताप व्यक्त करत ठिय्या आंदोलन केले आणि उच्चस्तरीय चौकशीची मागणी केली. या प्रकरणाचे गांभीर्य ओळखून पुणे महानगरपालिकेचे सहाय्यक आरोग्य अधिकारी डॉ. सूर्यकांत देवकर यांनी रुग्णालय प्रशासनाला नोटीस जारी केली आहे. प्रियांशीच्या उपचाराशी संबंधित सर्व वैद्यकीय कागदपत्रे, केस पेपर्स आणि अंतर्गत अहवाल २४ तासांच्या आत पालिकेच्या आरोग्य विभागाकडे सादर करण्याचे कडक आदेश देण्यात आले आहेत. पोलीस तपास आणि ससूनची चौकशी समितीया प्रकरणी प्रियांशीच्या वडिलांनी अलंकार पोलीस ठाण्यात रुग्णालयाविरुद्ध तक्रार दाखल केली आहे.

वरिष्ठ पोलीस निरीक्षक उल्हास कदम यांनी दिलेल्या माहितीनुसार, पोलिसांनी या प्रकरणाशी संबंधित सुमारे २० लोकांचे जबाब नोंदवण्यास सुरुवात केली आहे. प्रियांशीचे शवविच्छेदन (Post-Mortem) ससून रुग्णालयात करण्यात आले असून, ससून प्रशासन या प्रकरणाच्या सखोल चौकशीसाठी ४ सदस्यांची विशेष वैद्यकीय समिती (Medical Negligence Board) नेमणार आहे. या समितीच्या अंतिम अहवालानंतरच रुग्णालयाविरुद्ध रीतसर एफआयआर (FIR) दाखल केला जाईल.

दरम्यान, दीनानाथ मंगेशकर रुग्णालय प्रशासनाने ही घटना 'अतिशय दुर्दैवी' असल्याचे म्हटले असून अंतर्गत चौकशी सुरू केल्याचे स्पष्ट केले आहे. तसेच पोलीस आणि वैद्यकीय तपासणीला पूर्ण सहकार्य करण्याचे आश्वासन दिले आहे.