पैशांचा पाऊस पाडण्याचे आमिष! विवाहितेवर अत्याचार करणाऱ्या भोंदूबाबाला १० वर्षांची सक्तमजुरी.अहिल्यानगर न्यायालयाचा कडक निर्णय: जादूटोण्याच्या नावाखाली महिलांचे शोषण करणाऱ्या भोंदूबाबाला तुरुंगवास आणि मोठा दंड

अहिल्यानगर (अहमदनगर): घरातील लोकांचे आजारपण दूर करण्यासह आणि घरात पैशांचा पाऊस पाडण्याचे खोटे आमिष दाखवून एका विवाहित महिलेवर लैंगिक अत्याचार करणाऱ्या भोंदूबाबाला न्यायालयाने कडक शिक्षा सुनावली आहे. या ढोंगी बाबाचे नाव महादेवनाथ बाबा ऊर्फ ज्ञानदेव तुकाराम कांबळे (वय ४२, रा. शिर्सुफळ, ता. बारामती, जि. पुणे) असे आहे. जिल्हा न्यायाधीश एम. एस. भदाणे यांनी आरोपीला १० वर्षे सक्तमजुरी आणि ३८ हजार रुपयांच्या दंडाची शिक्षा ठोठावली आहे.

काय आहे संपूर्ण प्रकरण? पीडित विवाहितेच्या घरातील कौटुंबिक अडचणी, नातेवाईकांचे आजारपण आणि आर्थिक चणचणीचा गैरफायदा घेत या भोंदूबाबाने तिला आपल्या जाळ्यात ओढले होते. घरातील दोष दूर करण्यासाठी आणि जादूटोण्याच्या माध्यमातून पैशांचा पाऊस पाडण्याचा दावा त्याने केला होता.

या अघोरी विधी आणि पूजेच्या बहाण्याने त्याने पीडित महिलेचा छळ केला व तिच्यावर शारीरिक अत्याचार केले.बाबाकडून आपली फसवणूक आणि शोषण होत असल्याचे लक्षात आल्यानंतर पीडितेने हिंमत दाखवून पोलिसांत तक्रार दाखल केली होती.
पोलिसांनी या प्रकरणी जादूटोणाविरोधी कायदा, फसवणूक आणि अत्याचाराच्या कलमांखाली गुन्हा दाखल करून आरोपीला अटक केली होती.

न्यायालयाचा कठोर संदेशया खटल्याची सुनावणी अहिल्यानगर (अहमदनगर) जिल्हा न्यायालयात पार पडली. सरकारी पक्षाने सादर केलेले पुरावे आणि साक्षीदारांची साक्ष ग्राह्य धरून, न्यायालयाने जादूटोणा आणि फसवणुकीच्या या गंभीर गुन्ह्यासाठी महादेवनाथ बाबाला दोषी ठरवले. समाजात अंधश्रद्धेचा गैरफायदा घेऊन महिलांचे शोषण करणाऱ्यांना हा निकाल म्हणजे एक मोठा इशारा आहे.