इंदूर हादरले: आजोबांच्या एका छोट्या निष्काळजीपणामुळे ४ वर्षीय चिमुकलीचा कारमध्ये करुण अंत

मध्य प्रदेशातील इंदूर शहरातून एक अत्यंत हृदयद्रावक आणि धक्कादायक घटना समोर आली आहे. कडक उन्हाचा तडाखा आणि आजोबांच्या एका छोट्याशा निष्काळजीपणामुळे अवघ्या चार वर्षांच्या चिमुकलीला आपल्या प्राणाला मुकावे लागले आहे. कारच्या मागच्या सीटवर झोपलेल्या आपल्या लाडक्या नातीला आजोबा कारमध्येच विसरले आणि कडक उन्हात तब्बल दोन तास कारमध्ये बंद राहिल्याने मुलीचा गुदमरून मृत्यू झाला. या घटनेमुळे संपूर्ण परिसरात हळहळ व्यक्त केली जात आहे.

नेमकं काय घडलं?
इंदूर येथील नंदन वन कॉलनीमध्ये राहणारे साबिर हुसेन हे त्यांच्या कुटुंबातील लहान मुलांना कारमधून फिरायला घेऊन गेले होते. यामध्ये त्यांची ४ वर्षांची नातही सोबत होती. साधारण एक तासानंतर आजोबा सर्व मुलांना फिरवून घरी परतले. घरी आल्यानंतर इतर मुले कारमधून खाली उतरली, परंतु चिमुकली नात कारच्या मागच्या सीटवर झोपलेली होती. आजोबांचे तिच्याकडे लक्ष गेले नाही आणि ते कार पूर्णपणे लॉक करून घरात निघून गेले.

दोन तासानंतर शोध सुरू झाला
दुपारच्या रणरणत्या उन्हात कार पूर्णपणे लॉक होती. सुमारे दोन तास उलटून गेले तरी नात घरात कुठेच दिसत नाही हे लक्षात आल्यानंतर कुटुंबीयांनी तिची शोधाशोध सुरू केली. अखेर कारमध्ये पाहिले असता ती मागच्या सीटवर बेशुद्ध अवस्थेत आढळून आली.

कारच्या काचा आणि खिडक्या ऑटोमॅटिक व पूर्णपणे बंद असल्याने, कडक उन्हामुळे कारमध्ये प्रचंड उष्णता निर्माण झाली आणि ऑक्सिजन संपल्यामुळे ती बेशुद्ध पडली असावी, असा अंदाज वर्तवला जात आहे. तिला तातडीने रुग्णालयात नेण्यात आले, मात्र डॉक्टरांनी तिला तपासून मृत घोषित केले.

पोलीस तपास सुरू
या दुर्दैवी घटनेनंतर स्थानिक पोलिसांनी कायदेशीर कारवाई सुरू केली आहे. मृतदेहाचे जिल्हा रुग्णालयात शवविच्छेदन (Post-Mortem) करण्यात आले आहे. मृत बालिकेचे वडील व्यावसायिक असून, ती आपल्या दोन भावंडांमध्ये सर्वात लहान होती. आजोबांच्या एका चुकीमुळे हसत्याखेळत्या कुटुंबावर दुःखाचा डोंगर कोसळला आहे.