काळीज पिळवटून टाकणारी घटना: बुलढाण्यात लेकीच्या कन्यादानावेळीच पित्याचा हृदयविकाराने दुर्दैवी अंत.

बुलढाणा: आनंदाचे वातावरण, सनई-चौघड्यांचे सूर आणि मंगलमयी वातावरणाने न्हाऊन निघालेल्या एका लग्नकार्यात काळाने घाला घातला आहे. बुलढाणा जिल्ह्यातील सिंदखेड राजा तालुक्यातील वरदडी बुद्रुक येथे एका पित्याचा आपल्या लाडक्या लेकीचे कन्यादान करत असतानाच हृदयविकाराच्या तीव्र झटक्याने मृत्यू झाला. कुरुमदास पुंडलिक भुतेकर (वय ५०) असे या दुर्दैवी पित्याचे नाव आहे.

नेमकी घटना काय?
भुतेकर यांची कन्या नंदिनी हिचा विवाह जालना जिल्ह्यातील प्रदीप महादेव नानोटे यांच्याशी ठरला होता. १२ मे रोजी हा विवाह सोहळा मोठ्या उत्साहात पार पडला. दुपारचे मुख्य विधी आणि लग्न लागल्यानंतर सायंकाळी पाच वाजेच्या सुमारास मुलीची पाठवणी करण्यापूर्वीचा अत्यंत भावूक असा 'कन्यादान' विधी सुरू झाला. सर्व पाहुणे आणि वऱ्हाडी मंडळींच्या उपस्थितीत भुतेकर हे कन्यादानाचे विधी करत असतानाच अचानक त्यांच्या छातीत तीव्र कळ आली आणि ते जागीच कोसळले. त्यांना हृदयविकाराचा झटका आल्याचे लक्षात येताच उपस्थितांची धावपळ उडाली, मात्र त्यांचा मृत्यू झाला होता.

हृदय शस्त्रक्रिया झाली होती:
विशेष म्हणजे, कुरुमदास भुतेकर यांची अवघ्या चार महिन्यांपूर्वीच बायपास शस्त्रक्रिया झाली होती. गेल्या डिसेंबरमध्ये त्यांच्या आईचे निधन झाले होते, त्याच काळात त्यांना पहिला हृदयविकाराचा झटका आला होता. आपल्या मुलाचे लग्न २१ एप्रिल रोजी पार पाडल्यानंतर, अवघ्या २१ दिवसांच्या अंतराने त्यांनी मुलीचे लग्न लावून दिले होते. लाडक्या लेकीचा संसार सुखाचा व्हावा यासाठी ते गेल्या अनेक दिवसांपासून स्वतः धावपळ करत होते.

ज्या घरात काही वेळापूर्वी लग्नाचा उत्साह आणि लगबग होती, तिथे पित्याच्या निधनाने शोककळा पसरली आहे. गुरुवारी त्यांच्यावर अत्यंत शोकाकुल वातावरणात अंत्यसंस्कार करण्यात आले.