Pune - पुण्यातील वाघोलीत रक्ताचा सडा! चहा पिणाऱ्या विद्यार्थ्याच्या डोक्यात खुपसला कोयता; थरार सीसीटीव्हीत कैद

पुणे: पुण्यातील वाघोली परिसरात गुन्हेगारीने पुन्हा एकदा डोकेवर काढले असून, दिवसाढवळ्या एका महाविद्यालयीन विद्यार्थ्यावर कोयत्याने जीवघेणा हल्ला झाल्याची धक्कादायक घटना समोर आली आहे. विशेष म्हणजे, हल्ला इतका भीषण होता की आरोपीने मारलेला कोयता विद्यार्थ्याच्या डोक्यातच अडकून राहिला. या रक्तरंजित घटनेमुळे संपूर्ण पुणे जिल्ह्यात खळबळ उडाली आहे.
नेमकी घटना काय?
मिळालेल्या माहितीनुसार, ही घटना वाघोलीतील रायसोनी कॉलेज (Raisoni College) समोरील 'अखंड अमृततुल्य' हॉटेल येथे घडली. जखमी विद्यार्थ्याचे नाव नागेश सुनील जगताप (वय २२) असून, तो कॉम्प्युटर सायन्सच्या चौथ्या वर्षात शिकत आहे. गुरुवारी दुपारी ३:३० च्या सुमारास नागेश आणि त्याचा मित्र सिद्धेश भोसले हॉटेलबाहेर चहा पिण्यासाठी बसले होते.
त्याच वेळी दुचाकीवरून आरोपी मंगेश सांगळे हा त्याच्या दोन साथीदारांसह तिथे आला. "तू मला शिवी का दिलीस?" असा जाब विचारत त्यांच्यात वादावादी झाली. या वादाचे रूपांतर काही क्षणातच भीषण हल्ल्यात झाले.
डोक्यात कोयता अडकला, तरीही...

आरोपींनी सोबत आणलेल्या कोयत्याने नागेशवर सपासप वार करण्यास सुरुवात केली. नागेशच्या पाठीवर आणि शरीरावर वार केल्यानंतर, एक वार थेट त्याच्या डोक्यात करण्यात आला. हा वार इतका जोरात होता की कोयता नागेशच्या डोक्यातच रुतून बसला. जखमी नागेश याच अवस्थेत रक्ताच्या थारोळ्यात कोसळला. त्याला वाचवण्यासाठी गेलेला त्याचा मित्र सिद्धेश याच्यावरही आरोपींनी वार केले, ज्यात तोही जखमी झाला आहे.
सीसीटीव्हीमध्ये थरार कैद
या संपूर्ण घटनेचा थरकाप उडवणारा व्हिडीओ हॉटेलबाहेरील सीसीटीव्ही कॅमेऱ्यात कैद झाला आहे. घटनेनंतर आरोपींनी तिथून पळ काढला. नागेशला तातडीने वाघोलीतील खासगी रुग्णालयात आणि त्यानंतर अधिक उपचारांसाठी खराडी येथील रुग्णालयात दाखल करण्यात आले. डॉक्टरांनी शर्थीचे प्रयत्न करून त्याच्या डोक्यातील कोयता बाहेर काढला असून सध्या त्याच्यावर उपचार सुरू आहेत.
पोलिसांची कारवाई
या प्रकरणी वाघोली पोलिसांनी वेगाने तपास चक्र फिरवून मुख्य आरोपी मंगेश सांगळे (वय २३) आणि पवन राठोड (वय १८) या दोघांना अटक केली आहे. त्यांच्यावर खुनाचा प्रयत्न केल्याचा (IPC 307) गुन्हा दाखल करण्यात आला आहे. भरदिवसा कॉलेज परिसरात घडलेल्या या प्रकारामुळे विद्यार्थ्यांच्या सुरक्षेचा प्रश्न पुन्हा एकदा ऐरणीवर आला आहे.