नाशिक हादरले! टीसीएस धर्मांतर प्रकरणात 'मिशन कन्व्हर्जन'चा संशय; मुख्य आरोपी निदा खान फरार, एसआयटीकडून शोध सुरू

नाशिक: नाशिकमधील एका नामांकित आयटी कंपनीशी संबंधित कथित लैंगिक अत्याचार आणि बेकायदेशीर धर्मांतर प्रकरणाला आता गंभीर वळण मिळाले आहे. या प्रकरणातील मुख्य संशयित आरोपी निदा खान हिच्यावर 'मिशन कन्व्हर्जन'ची मोठी जबाबदारी सोपवण्यात आल्याचा संशय विशेष तपास पथकाने (SIT) व्यक्त केला आहे. न्यायालयाकडून अटकपूर्व जामीन फेटाळला गेल्यानंतर निदा खान सध्या फरार असून, तिचा शोध घेण्यासाठी राज्यभरात विशेष पथके तैनात करण्यात आली आहेत.

विशिष्ट कर्मचाऱ्यांना 'लक्ष्य' करण्याचा डाव?
मुंबई नाका आणि देवळाली कॅम्प पोलीस ठाण्यात दाखल झालेल्या गुन्ह्यांनुसार, निदा खान हिने टीसीएसमधील काही पुरुष आणि महिला कर्मचाऱ्यांचे जाणीवपूर्वक धर्मांतर घडवून आणण्याचा प्रयत्न केला. तपासादरम्यान समोर आलेल्या माहितीनुसार, पीडितांना गुंगीचे पदार्थ देऊन त्यांच्यावर अत्याचार करणे, धार्मिक भावना दुखावणे आणि त्यांना धमकावणे असे गंभीर आरोप आरोपींवर ठेवण्यात आले आहेत. एसआयटीच्या मते, निदा खान ही केवळ या कटाचा भाग नव्हती, तर विशिष्ट व्यक्तींना शोधून त्यांना धर्मांतरासाठी प्रवृत्त करण्याचे काम तिच्याकडे सोपवण्यात आले होते.

आंतरराष्ट्रीय कनेक्शनची शक्यता
या प्रकरणाची सुरुवात २ एप्रिल रोजी एका पुरुष कर्मचाऱ्याने दिलेल्या तक्रारीनंतर झाली. पोलिसांनी तातडीने कारवाई करत तौसिफ अत्तार, दानिश शेख, शाहरुख कुरेशी आणि रझा मेमन या चौघांना अटक केली असून ते सध्या न्यायालयीन कोठडीत आहेत. पोलिसांना मिळालेल्या डिजिटल पुराव्यांवरून आणि आरोपींच्या संभाषणावरून या प्रकरणाचे धागेदोरे राज्याबाहेर किंवा आंतरराष्ट्रीय स्तरावरील जाळ्याशी जोडलेले असण्याची शक्यता वर्तवली जात आहे.

भोंदूबाबा अशोक खरात प्रकरणाचाही पाठपुरावा
दुसरीकडे, नाशिकमधीलच भोंदूबाबा अशोक खरात प्रकरणाचा तपासही अंतिम टप्प्यात आला आहे. महिलांवरील अत्याचार आणि फसवणुकीच्या नऊ गुन्ह्यांमध्ये खरात विरोधात दोषारोपपत्र (चार्जशीट) दाखल करण्याची तयारी एसआयटीने केली आहे. पीडितांचे जबाब आणि तांत्रिक पुराव्यांच्या आधारे पुढील आठवड्यात न्यायालयात हे दोषारोपपत्र सादर होण्याची शक्यता आहे.

प्रशासन सतर्क, मोठ्या खुलाशांची शक्यता
या दोन्ही संवेदनशील प्रकरणांमुळे नाशिकसह संपूर्ण राज्यात खळबळ उडाली असून राज्यातील कायदा आणि सुव्यवस्थेचा प्रश्न ऐरणीवर आला आहे. पोलीस सध्या तांत्रिक पुरावे आणि आर्थिक व्यवहारांची साखळी तपासत असून, निदा खान हिला अटक झाल्यानंतर या 'धर्मांतर रॅकेट'मधील आणखी मोठे खुलासे होण्याची दाट शक्यता आहे.