ठाणे: परिसर स्वच्छ ठेवण्यास सांगितल्याने रिक्षाचालकाने ज्येष्ठ नागरिकाच्या थोबाडीत मारली!

ठाणे: रस्त्यावर अस्वच्छता पसरवणाऱ्या एका रिक्षाचालकाला परिसर स्वच्छ ठेवण्याबाबत समज देणे एका ज्येष्ठ नागरिकाला महागात पडले आहे. ही समज दिल्याने संतापलेल्या रिक्षाचालकाने त्या आजोबांच्या थेट थोबाडीत मारली आणि दगड घेऊन त्यांच्या अंगावर धावून गेला. या घटनेचा व्हिडीओ सोशल मीडियावर प्रचंड व्हायरल होत आहे.

नेमकी घटना काय? सोशल मीडियावर @saurabhkoratkar या एक्स (X) अकाउंटवरून हा व्हिडीओ शेअर करण्यात आला आहे. या व्हिडीओमध्ये एक रिक्षाचालक ज्येष्ठ नागरिकाला शिवीगाळ करत त्यांच्यावर हात उचलताना स्पष्ट दिसत आहे. त्या ज्येष्ठ नागरिकाने केवळ संबंधित रिक्षाचालकाला परिसर स्वच्छ ठेवण्यास सांगितले होते, मात्र ही गोष्ट रिक्षाचालकाला आवडली नाही आणि त्यातूनच हा वाद झाला.

रिक्षाचालकावर कारवाई: हा व्हिडीओ व्हायरल झाल्यानंतर नेटकऱ्यांनी प्रचंड संताप व्यक्त केला असून रिक्षाचालकावर कठोर कारवाई करण्याची मागणी केली आहे. त्यानंतर, शिवसेनेच्या कार्यकर्त्यांनी या रिक्षाचालकाला शोधून त्याला पकडले
आणि पोलिसांच्या स्वाधीन केले.