Shirur Forest Department Installs ‘Base Alarm System’ to Alert Villagers of Leopard Presence

शिरूर (शिक्रापूर): शिरूर तालुक्यातील करंदी आणि परिसरात बिबट्याचा वावर वाढल्याने नागरिकांमध्ये भीतीचे वातावरण होते. या समस्येवर तांत्रिक तोडगा काढत वनविभागाने करंदी गावात कृत्रिम बुद्धिमत्तेवर (AI) आधारित ''बेस अलार्म सिस्टम'' यशस्वीपणे बसवली आहे. आता परिसरात बिबट्या दिसताच सायरन वाजणार असून, यामुळे ग्रामस्थांना तात्काळ सतर्क होता येणार आहे.

काय आहे ही यंत्रणा?
ही यंत्रणा कृत्रिम बुद्धिमत्तेवर आधारित असून ती कॅमेऱ्यांच्या साहाय्याने काम करते. जेव्हा एखादा हिंस्र प्राणी किंवा बिबट्या कॅमेऱ्याच्या टप्प्यात येतो, तेव्हा ही सिस्टम त्याचे विश्लेषण करते आणि तातडीने मोठा सायरन वाजवते. यामुळे रात्रीच्या वेळी शेतात जाणारे शेतकरी, मजूर आणि वस्तीवरील नागरिकांना बिबट्या जवळ असल्याची पूर्वसूचना मिळेल.

ग्रामस्थांच्या मागणीला यश:
करंदी परिसरात गेल्या काही दिवसांपासून बिबट्याचा वावर मोठ्या प्रमाणात वाढला होता. बिबट्याने पाळीव प्राण्यांवर हल्ले केल्याच्या घटना घडल्या होत्या, तसेच बिबट्या घरांच्या परिसरात फिरताना सीसीटीव्हीमध्ये कैद झाला होता. ग्रामस्थ आणि पोलीस पाटील वंदना साबळे यांनी यासंदर्भात वनविभागाकडे पाठपुरावा केला होता. वरिष्ठ कार्यालयाकडून निधी मंजूर होताच धामारी रोड परिसरात ही यंत्रणा बसवण्यात आली आहे.

शिरूर तालुक्यात १७ ठिकाणी यंत्रणा:
वनपरिक्षेत्र अधिकारी नीळकंठ गव्हाणे यांनी दिलेल्या माहितीनुसार, शिरूर तालुक्यात आतापर्यंत एकूण १७ ठिकाणी अशी 'बेस अलार्म सिस्टम' बसवण्यात आली आहे. इतर काही संवेदनशील गावांचे प्रस्तावही मंजुरीसाठी पाठवण्यात आले असून, निधी उपलब्ध होताच तिथेही ही यंत्रणा कार्यान्वित केली जाईल.

या यंत्रणेच्या चाचणीवेळी वनविभागाचे अधिकारी सोपान अनासुने, पोलीस पाटील वंदना साबळे, आपत्ती व्यवस्थापन मित्र आणि ग्रामस्थ मोठ्या संख्येने उपस्थित होते. या तंत्रज्ञानामुळे शेतकरी आणि शाळकरी मुलांच्या सुरक्षेचा प्रश्न सुटण्यास मोठी मदत होणार आहे.