सख्ख्या आई अन् भावांचा बहिणीविरुद्ध कट; वडिलांच्या निधनानंतर बनावट स्वाक्षरी करून हडपली कोट्यवधींची मालमत्ता!

अंबरनाथ/ठाणे: रक्ताच्या नात्याला काळीमा फासणारी एक धक्कादायक घटना ठाणे जिल्ह्यातून समोर आली आहे. वडिलांच्या निधनानंतर सख्ख्या आईने आणि दोन भावांनी मिळून आपल्याच बहिणीला संपत्तीतून बेदखल करण्यासाठी चक्क वडिलांचे बनावट मृत्यूपत्र आणि पॉवर ऑफ ॲटर्नी तयार केल्याचा प्रकार उघडकीस आला आहे. तब्बल सहा महिन्यांच्या कायदेशीर लढाईनंतर, पीडित बहिणीच्या तक्रारीवरून पोलिसांनी आई, दोन भाऊ आणि दोन साक्षीदारांविरुद्ध गुन्हा दाखल केला आहे.

मिळालेल्या माहितीनुसार, आनंदराव करंजुले यांच्या निधनानंतर त्यांची कोट्यवधी रुपयांची मालमत्ता हडपण्यासाठी हा कट रचण्यात आला. तक्रारदार अर्चना करंजुले यांनी आरोप केला आहे की, त्यांचे भाऊ प्रशांत आणि संतोष करंजुले तसेच आई सुनंदा यांनी वडिलांच्या जुन्या सह्यांचा वापर करून किंवा बनावट सह्या करून खोटे मृत्यूपत्र तयार केले. यामध्ये मागील तारखेच्या स्टॅम्प पेपरचा वापर करून हे दस्तऐवज खरे भासवण्याचा प्रयत्न केला गेला.

अर्चना यांनी माहिती अधिकारांतर्गत (RTI) मिळवलेल्या माहितीमुळे या घोटाळ्याचा पर्दाफाश झाला. स्टॅम्प पेपरच्या तारखा आणि खरेदीदारांची नावे यात मोठी तफावत आढळली. आपल्या कायदेशीर हक्कासाठी अर्चना यांनी पोलिसांत धाव घेतली होती, मात्र सुरुवातीला दाद न मिळाल्याने त्यांनी सहा महिने लढा दिला. अखेर महात्मा फुले पोलीस ठाण्यात फसवणूक, बनावट दस्तऐवज तयार करणे आणि गुन्हेगारी कटाचा गुन्हा दाखल करण्यात आला आहे. या प्रकरणात दोन व्यावसायिक साथीदारांनाही आरोपी करण्यात आले आहे.