कोल्हापुरात सावकाराचा नराधमपणा: पैशांच्या बदल्यात महिलेवर अत्याचार, मोबाईलमध्ये आढळले शेकडो अश्लील व्हिडिओ

कोल्हापूर: कोल्हापूर शहरात माणुसकीला काळीमा फासणारी एक धक्कादायक घटना समोर आली आहे. व्याजाने दिलेल्या पैशांच्या बदल्यात एका खासगी सावकाराने महिलेवर वारंवार अत्याचार केल्याचा प्रकार उघडकीस आला आहे. या प्रकरणी गांधीनगर पोलिसांनी संशयित आरोपी अमित सावंत याला अटक केली असून, त्याच्या मोबाईलमध्ये सुमारे २०० ते ३०० अश्लील व्हिडिओ असल्याचे समोर आल्याने खळबळ उडाली आहे.

नेमके प्रकरण काय? पीडित महिलेने घरगुती अडचणींमुळे अमित सावंत याच्याकडून १० टक्के व्याजाने २ लाख रुपये घेतले होते. या पैशांची नियमित परतफेड करणे महिलेला शक्य झाले नाही. हीच संधी साधून सावंतने महिलेकडे शरीरसंबंधांची मागणी केली. महिला घरी एकटी असताना त्याने तिच्यावर अत्याचार केला आणि त्याचे अश्लील फोटो व व्हिडिओ काढले.

ब्लॅकमेलिंग आणि दहशत: हे व्हिडिओ व्हायरल करण्याची धमकी देऊन सावंतने पीडितेला वारंवार हॉटेल आणि कारमध्ये बोलावून तिचे लैंगिक शोषण केले. धक्कादायक बाब म्हणजे, नोव्हेंबर २०२५ पर्यंत पीडितेने व्याजासह संपूर्ण २ लाख रुपये परत केले होते. तरीही आरोपीने अधिक पैशांची मागणी सुरूच ठेवली आणि महिलेच्या अश्लील व्हिडिओचा वापर करून तिला ब्लॅकमेल करणे थांबवले नाही.

कुटुंबालाही मारहाण: आरोपीने पीडितेचे अश्लील व्हिडिओ एका कार मालकाला पाठवून तिची बदनामी केली. जेव्हा पीडितेच्या जावयाने या प्रकाराचा जाब विचारण्यासाठी सावंतला गाठले, तेव्हा त्यालाही हॉटेलवर बोलावून बेदम मारहाण करण्यात आली. अखेर या छळाला कंटाळून महिलेने गांधीनगर पोलीस ठाण्यात तक्रार दाखल केली.

मोठ्या रॅकेटची शक्यता: पीडित महिलेने दावा केला आहे की, आरोपीच्या मोबाईलमध्ये शेकडो अश्लील व्हिडिओ आहेत आणि या कृत्यात त्याच्या मित्रांचाही सहभाग असू शकतो. "इतर महिलांनी या जाळ्यात अडकू नये, यासाठी आरोपीला कठोर शिक्षा व्हावी," अशी मागणी पीडितेने केली आहे. या प्रकारामुळे कोल्हापुरात खासगी सावकारी आणि त्यातून होणाऱ्या शोषणाचा प्रश्न पुन्हा एकदा ऐरणीवर आला आहे.