Pune RMC Plants Violate Closure: Operational at Night Despite Association’s Call; PMC Warns of Strict Action

पुणे: शहरातील रेडी मिक्स काँक्रीट (आरएमसी) प्रकल्पांमुळे होणारे प्रदूषण आणि स्थानिक नागरिकांच्या वाढत्या तक्रारींच्या पार्श्वभूमीवर, पुणे आरएमसी असोसिएशनने बुधवारपासून प्रकल्प बंद ठेवण्याची घोषणा केली होती. मात्र, हे प्रकल्प दिवसा बंद असल्याचे दाखवून रात्रीच्या वेळी जोमाने सुरू असल्याचे समोर आले आहे. या फसवणुकीमुळे संतापलेल्या पुणे महानगरपालिकेने (PMC) आता अशा प्रकल्पांवर कडक कारवाई करण्याचा पवित्रा घेतला आहे.

नेमके प्रकरण काय?
आरएमसी प्रकल्पांमुळे हवेचे प्रदूषण वाढले असून परिसरात धुळीचे साम्राज्य पसरले आहे. लोहगाव, वाघोली, वडगाव खुर्द आणि धायरी यांसारख्या भागांत नागरिक श्वसनाच्या आजारांनी त्रस्त आहेत. या तक्रारींची दखल घेत आरएमसी असोसिएशनने "आत्मपरीक्षणासाठी" प्रकल्प काही काळ बंद ठेवण्याचा निर्णय जाहीर केला होता. मात्र, प्रत्यक्षात रात्रीच्या अंधारात डंपर आणि मिक्सरच्या फेऱ्या सुरूच असल्याचे निदर्शनास आले आहे.

राजकीय दबाव आणि कारवाई:
वडगाव खुर्द येथील काही प्रकल्प एका बड्या लोकप्रतिनिधीच्या नातेवाईकांचे असल्याने, महापालिकेच्या कारवाईत वारंवार अडथळे येत असल्याचा आरोप स्थानिक रहिवाशांनी केला आहे. यापूर्वी नियोजित असलेली कारवाई अचानक रद्द करण्यात आल्याने नागरिकांमध्ये मोठा रोष आहे.

आयुक्तांचे स्पष्ट निर्देश:
या संपूर्ण प्रकारावर पुणे महापालिका आयुक्त नवल किशोर राम यांनी स्पष्ट भूमिका मांडली आहे. "आरएमसी प्रकल्पांवरील थांबलेली कारवाई पुन्हा सुरू करण्याचे आदेश देण्यात आले आहेत. कोणत्याही राजकीय दबावाला न जुमानता, नियम मोडणाऱ्या आणि नागरिकांना त्रास देणाऱ्या प्रकल्पांवर कठोर कारवाई केली जाईल," असे आयुक्तांनी स्पष्ट केले.

रहिवाशांचा आंदोलनाचा इशारा:
प्रशासनाच्या दिरंगाईमुळे त्रस्त झालेल्या वडगाव खुर्द परिसरातील विविध सोसायट्यांमधील रहिवाशांनी आता तीव्र आंदोलनाचा इशारा दिला आहे. महापालिका केवळ दिखाव्यासाठी कारवाई करते, असा आरोप करत रहिवाशांनी आता रस्त्यावर उतरण्याची तयारी दर्शवली आहे.