आधी गोळी झाडली, लागली नाही म्हणून जे मिळेल त्यानं मारलं; पुण्यात मध्यरात्री तरुणाला निर्घृणपणे संपवलं

Pune Vishrantwadi Youth Killed : राज्यात दिवसेंदिवस गुन्हेगारीचं प्रमाण वाढत चाललं आहे. अशातच पुण्यात पुन्हा एकदा हत्येची घटना समोर आली आहे. जुन्या वादातून या तरुणाला संपवलं आहे.

पुणे : पुण्यातील विश्रांतवाडी परिसरात काल मंगळवारी मध्यरात्रीच्या सुमारास एक भीषण हत्येची घटना घडली. पूर्वीच्या वादातून १८ वर्षीय तरुणाची अत्यंत क्रूरपणे हत्या करण्यात आली असून, या घटनेमुळे परिसरात मोठी खळबळ उडाली आहे.

मिळालेल्या प्राथमिक माहितीनुसार, ही घटना विश्रांतवाडीतील कॉमर्स झोन परिसरात रात्री साडेअकरा ते साडेबारा वाजण्याच्या दरम्यान घडली. मृत तरुणाचं नाव गौरव गणेश तेलंगी (वय १८, रा. सिंहगड रोड, नवले हॉस्पिटलजवळ) असं आहे.

गोळी लागली नाही म्हणून दगडाने ठेचलं पोलिसांनी दिलेल्या माहितीनुसार, आरोपी तौफिक शेख आणि त्याच्या साथीदारांनी गौरववर हल्ला केला. सुरुवातीला गोळीबार करण्यात आल्याची माहिती समोर येत आहे. मात्र, गोळी लागली नाही. त्यानंतर आरोपींनी कोयता, दगड आणि विटांचा वापर करत गौरववर जोरदार हल्ला चढवला. डोक्यावर वार करत त्याची निर्घृण हत्या करण्यात आली. हा संपूर्ण प्रकार पूर्वीच्या वादातून घडल्याची शक्यता वर्तवली जात आहे. घटनेनंतर परिसरात भीतीचं वातावरण निर्माण झालं असून, स्थानिक नागरिकांमध्ये संताप व्यक्त केला जात आहे.

याप्रकरणी पुणे पोलीस यांनी गुन्हा दाखल केला असून, आरोपींचा शोध सुरू आहे. घटनेचा अधिक तपास पोलीस करत आहेत. दरम्यान, एवढ्या निर्घृण पद्धतीने झालेल्या हत्येमुळे पुण्यातील कायदा-सुव्यवस्थेवर प्रश्नचिन्ह उपस्थित होत आहे. मध्यरात्री झालेल्या या हत्येमुळे नागरिकांमध्ये भीतीचं वातावरण निर्माण झालं आहे.

पुण्यासारख्या शहरामध्ये वाढणारी गुन्हेगारी कमी कधी होणार? सुसंस्कृत शहरामध्ये आपणही सुरक्षित आहोत का? असे प्रश्न आता पुणेकरांच्या मानत निर्माण होत आहेत.

सासरच्या छळाला कंटाळून विवाहितेची आत्महत्या
पुण्यातल्या कात्रज परिसरात घडलेली एक हृदय पिळवटून टाकणारी घटना सध्या सगळ्यांच्याच मनाला अस्वस्थ करून जातेय. सासरी घरात सुरू असलेल्या सततच्या छळाला कंटाळून एका विवाहित महिलेनं थेट स्वतःलाच पेटवून घेतलं, आणि काही दिवस मृत्यूशी झुंज दिल्यानंतर अखेर तिचा दुर्दैवी मृत्यू झाला आहे.