पुण्यात भाजपच्या आजी-माजी नगरसेविकांमध्ये तुफान खडाजंगी; वसतिगृहाच्या कामावरून आरोप-प्रत्यारोप

Pune :पुण्यातील राजकीय वर्तुळात सध्या मोठी खळबळ उडवणारी घटना समोर आली आहे. बाणेर परिसरातील वसतिगृहाच्या कामावरून भाजपच्या आजी आणि माजी नगरसेविकांमध्ये जोरदार वाद झाल्याची माहिती मिळत आहे. या वादाचा व्हिडिओ सोशल मीडियावर वेगाने व्हायरल होत असून, पक्षातील अंतर्गत मतभेद चव्हाट्यावर आले आहेत.

टक्केवारीच्या मुद्द्यावरून वाद पेटला

मिळालेल्या माहितीनुसार, बाणेर येथे मागासवर्गीय आदिवासी विद्यार्थ्यांसाठी निवासी शिक्षण केंद्र उभारण्याचे काम सुरू आहे. 2017 मध्ये माजी नगरसेविका राजश्री काळे यांनी या प्रकल्पासाठी पुढाकार घेतला होता. मात्र, अनेक वर्ष उलटूनही हे काम अद्याप पूर्ण झालेले नाही.

दरम्यान, रखडलेल्या या प्रकल्पासाठी सुमारे ३ कोटी रुपयांची निविदा काढण्यात आली आहे. या कामाच्या पाठपुराव्यासाठी राजश्री काळे भवन रचना विभागात गेल्या असता, विद्यमान नगरसेविका रोहिणी चिमटे आणि संबंधित ठेकेदार यांच्यात चर्चा सुरू असल्याचे त्यांनी पाहिले. याचवेळी कामाच्या टक्केवारीवरून दोघींमध्ये तीव्र वाद झाला असल्याचा आरोप केला जात आहे.

पक्षातील वाद उघड्यावर

या घटनेनंतर दोन्ही गटांमध्ये आरोप-प्रत्यारोपांची मालिका सुरू झाली असून, हा वाद आता उघडपणे समोर आला आहे. भाजपमधील दोन महिला पदाधिकाऱ्यांमधील हा संघर्ष शहरात चर्चेचा विषय ठरत आहे.

दरम्यान, व्हायरल व्हिडिओमुळे या प्रकरणाने अधिकच तापलेले वातावरण पाहायला मिळत आहे. पुढे पक्ष नेतृत्व यावर काय भूमिका घेणार, याकडे सर्वांचे लक्ष लागले आहे.