Pune Crime : ‘‘आय मिस यू दिव्यांशी…’,पत्नी-मुलीचा विरह असह्य; फेसबुक लाईव्ह करत तरुणानं उचललं टोकाचं पाऊल, पुण्यात खळबळ

Pimpri-Chinchwad : पिंपरी-चिंचवडमधून एक धक्कादायक आणि हृदयद्रावक घटना समोर आली आहे. पत्नी आणि मुलगी घर सोडून गेल्याच्या मानसिक तणावातून एका तरुणाने फेसबुक लाईव्ह करत आत्महत्या केल्याची घटना भोसरी परिसरात घडली आहे. केशरी प्रसाद शाहू असं या तरुणाचं नाव आहे. ही घटना काल दुपारी साडेचारच्या सुमारास घडली. केशरी प्रसाद शाहू याने भोसरीतील भाजी मंडईच्या दुसऱ्या मजल्यावरील पाण्याच्या टाकीवरून उडी घेत आपलं जीवन संपवलं.

'मला माझं आयुष्य जगायचं आहे'
आत्महत्येपूर्वी केशरी प्रसाद शाहू याने फेसबुक लाईव्ह करून आपली व्यथा मांडण्याचा प्रयत्न केला होता. या लाईव्हमध्ये तो रडत रडत 'मला माझ्या पत्नीला भेटायचं आहे, मला माझं आयुष्य जगायचं आहे', असं म्हणताना दिसतो. आत्महत्येपूर्वी केशरी प्रसाद शाहू याने तीन पानांची सुसाईड नोटही लिहिल्याची माहिती समोर आली आहे. या चिठ्ठीतून त्याचं आपल्या मुलीवर असलेलं प्रचंड प्रेम स्पष्टपणे दिसून येतं. 'मी माझ्या मुलीवर खूप प्रेम करतो, आय मिस यू दिव्यांशी', असा उल्लेख त्याने सुसाईड नोटमध्ये अनेकदा केला आहे.

Naigaon : तब्बल 1000 कोटींचा जमीन घोटाळा उघड; बनावट कागदपत्रांच्या आधारे फसवणूक, शासकीय अधिकाऱ्यांसह चौघांवर गुन्हा दाखल, नेमकं काय घडलं?

सविस्तर माहिती अशी की, केशरी प्रसाद शाहू याची पत्नी गेल्या काही महिन्यांपासून त्याच्यासोबत राहत नव्हती. पत्नी मुलीसह घर सोडून गेल्यानंतर तो एकटाच राहत होता. या घटनेमुळे तो तीव्र मानसिक तणावात होता. काल दुपारी तो भोसरीतील भाजी मंडईच्या दुसऱ्या मजल्यावर गेला आणि पाण्याच्या टाकीवर चढला. त्याने मद्यपान केल्याचा संशय पोलिसांनी व्यक्त केला आहे. आत्महत्येपूर्वी त्याने सुमारे एक मिनिट सहा सेकंदांचं फेसबुक लाईव्ह केलं होतं. या लाईव्हमध्ये 'मला जगायचं आहे, मला माझ्या पत्नीला भेटायचं आहे', असं तो वारंवार म्हणताना दिसतो.

पाण्याच्या टाकीवरुन उडी टाकली
दरम्यान, तो पाण्याच्या टाकीवरून उडी घेण्याच्या तयारीत असल्याची माहिती मिळताच भोसरी पोलीस, अग्निशमन दल आणि रुग्णवाहिकेला तात्काळ पाचारण करण्यात आलं. जवळपास अर्धा ते पाऊण तास पोलीस आणि अग्निशमन दलाच्या जवानांनी त्याची समजूत काढण्याचा प्रयत्न केला. मात्र, तो कोणाचंही ऐकण्याच्या स्थितीत नव्हता. घटनास्थळी बघ्यांची मोठी गर्दी जमली होती. काही जणांनी त्याला वाचवण्यासाठी टाकीवर चढण्याचाही प्रयत्न केला, मात्र तो उडी घेईल या भीतीने कोणीही पुढे सरसावू शकलं नाही. अनेक नागरिकांनी हा प्रसंग मोबाईलमध्ये कैद केला. अखेर केशरी प्रसाद शाहू याने दुसऱ्या मजल्यावरील पाण्याच्या टाकीवरून थेट उडी घेत आत्महत्या केली.

या घटनेनंतर परिसरात हळहळ व्यक्त केली जात असून, आत्महत्येपूर्वी केलेला फेसबुक लाईव्ह व्हिडिओ सध्या सोशल मीडियावर मोठ्या प्रमाणात व्हायरल होत आहे. केशरी प्रसाद शाहू याने आधीच आत्महत्येची तयारी केली होती. त्याने लिहिलेल्या सुसाईड नोटमध्ये पत्नी आणि मुलीवरील प्रेमातूनच आपण हे टोकाचं पाऊल उचलत असल्याचं नमूद केलं आहे. पत्नी-मुलीचा विरह सहन न झाल्याने त्याने मृत्यूला कवटाळल्याचं स्पष्ट होत आहे. तसेच, मृत्यूनंतर आपल्या मुलीच्या हातून अग्नी द्यावा किंवा आपल्याला दफन करण्यात यावं, अशी इच्छाही त्याने सुसाईड नोटमध्ये व्यक्त केली आहे.

सुसाईड नोटमध्ये नेमकं काय म्हटलं आहे?
सुसाईड नोटमध्ये केशरी प्रसाद शाहू याने काही गंभीर आरोप केले आहेत. 'मी पूर्ण शुद्धीत ही सुसाईड नोट लिहीत आहे. माझ्या पत्नीला पळवून लावण्यात काही जणांचा हात आहे. त्यांना माझी पत्नी कुठे आहे हे माहीत आहे. माझ्या मृत्यूला हेच जबाबदार आहेत. मला न्याय हवा आहे,' असं त्याने नमूद केलं आहे. तसेच, पोलिसांनी सीसीटीव्ही फुटेज तपासले नसल्याचा आरोप करत, 'मला माझं आयुष्य पत्नी आणि मुलीसोबत जगायचं आहे. आता मला हे सहन होत नाही,' अशा शब्दांत त्याने आपली वेदना व्यक्त केली आहे. या प्रकरणाचा पुढील तपास भोसरी पोलीस करत असून, सुसाईड नोट आणि फेसबुक लाईव्हच्या आधारे अधिक तपास सुरू आहे.